თბილისის საქალაქო სასამართლომ შპს „მენეჯმენტ სერვისი“ და შპს „ბურჯი“ 2 363 475 ლარით დააჯარიმა.
როგორც „ნიუსპრესს“ კომპანიის ადვოკატმა ალა კახნიაურმა სასამართლო პროცესის  დასრულების შემდეგ განუცხადა, აღნიშნული თანხა კომპანიებმა სოლიდარულად უნდა გადაიხადონ.
ადვოკატის თქმით, საქართველოში კანონი არ არსებობს და სახელმწიფო სტრუქტურები უკანონო საბუთების შედგენაზე არიან გადასულნი.
„სახელმწიფო აუდიტის სამსახური შპს „ბურჯსა“ და შპს „მენეჯმენტ სერვისს“ ოფისების ქირით აღებაში და ძვირადღირებული სარემონტო სამუშაოების ჩატარებაში ედავება. მათი ინფორმაციით, ამის შემდეგ თითქოს კომპანიებმა შეგნებულად შეამცირეს თანხები და ოფისები პოლიტიკურ პარტიებს მიაქირავეს“ - განმარტა კახნიაურმა.
მისივე თქმით, სასამართლოს სხდომაზე 200-გვერდიანი მტკიცებულებები ჰქონდათ წარდგენილი, რომელიც სასამართლომ არ გაითვალისწინა.
კახნიაურის განცხადებით, სასამართლომ მხოლოდ სახელმწიფო აუდიტის მიერ წარმოდგენილი ყალბი საბუთი - „არაფრისმთქმელი ცხრილი“ გაითვალისწინა, რომლის საფუძველზეც გამოიტანეს აღნშნული გადაწყვეტილება.
მისივე ინფორმაციით, რადგან ორივე კომპანია სახელმწიფო აუდიტის სამსახურის მონაცემებით პოლიტიკურ კოალიცია „ქართულ ოცნებასთან“ არის დაკავშირებული, შესაბამისად, ჯარიმა მათ ერთობლივად დაუწესდათ, რომელიც მოსამართლის გადაწყვეტილებით ერთი კვირის ვადაში უნდა გადაიხადონ.
ფინანსური მონიტორინგის სამსახურმა შპს „ბურჯის“ საბანკო ანგარიშებს და ქონებას ყადაღა დაადო. ამის შესახებ განცხადებას სახელმწიფო აუდიტის სამსახურმა გუშინ გაავრცელა. განცხადებაში ნათქვამია, რომ შპს „ბურჯმა“ 2012 წლის განმავლობაში მილიონობით ლარის ღირებულების 250-მდე ერთეული ავტოსატრანსპორტო საშუალება შეიძინა, რომლითაც კოალიცია „ქართულ ოცნებაში“ შემავალ პარტიებს უწევდა მომსახურებას.
დღესვე სასამართლომ, მხოლოდ შპს "ბურჯს" 8 644 640 ლარის ოდენობის ჯარიმის გადახდაც დააკისრა.