შინაგან საქმეთა მინისტრის გიორგი გახარიას განცხადებით, სპეცოპერაციის საკითხის ირგვლივ რაიმე სახის ინტერპრეტაციებისაგან ყველამ თავი უნდა შეიკაოს.

მისივე თქმით, დღეს არის მშვიდად, წყნარად გამოძიებაზე მუშაობის დრო.

ამასთან, შს მინისტრმა დაღუპული მებრძოლის ოჯახს მიუსამძიმრა.

„პირველ რიგში ღრმა მწუხარებას გამოვთქვამ მებრძოლის დაღუპვის გამო და ვუსამძიმრებ მის ოჯახსა და თანაშრომლებს. ესაა უდიდესი დანაკარგი. ჩვენ გვაქვს ვალდებულება, რომ გვახსოვდეს და გავაგრძელოთ ის საქმე, რასაც მისი სიცოცხლე შეეწირა. ყველას კარგად გვესმის, რომ დღეს არის უკვე მშვიდად, წყნარად გამოძიებაზე მუშაობის დრო. არავის არ აქვს ინტერპრეტაციების გაკეთების უფლება დღეს. რა თქმა უნდა, შეგვიძლია ვიმსჯელოთ ყველაფერზე, მაგრამ სანამ არ დასრულდება გამოძიება, სანამ არ დასრულდება ექსპერტიზების ის ეტაპები, რომლებიც აუცილებელია, კონკრეტული მსჯელობისგან, ალბათ, სჯობს თავი შევიკავოთ. იმისთვის, რომ ვიმსჯელოთ, გამოძიებისა და ექსპერტიზის დასრულებას უნდა დაველოდოთ“-განაცხადა შს მინისტრმა.

გუშინ ჩატარებული სპეცოპერაციისას ერთი სპეცრაზმელი გარდაიცვალა და სამი დაიჭრა.
ოპერაციისას ერთი პირი დააკავეს, ხოლო სამის ლიკვიდირება მოხდა. ისინი
სავარაუდოდ, დანაშაულებრივი დაჯგუფების წევრები არიან.