დემირელის კერძო კოლეჯის ხარისხის მართვის ყოფილი მენეჯერის მუსტაფა ემრე ჩაბუქის განცხადებით, მას ტერორიზმთან კავშირი არ აქვს და არც რომელიმე საეჭვო ორგანიზაციაში თანხა გადაურიცხავს.
ამის შესახებ ჩაბუქმა სასამართლოს დღევანდელ სხდომაზე განაცხადა, რომელიც დახურულ რეჟიმში წარიმართა.
ჩაბუქმა სასამართლოზე სიტყვით გამოსვლისას თავისი ოჯახისთვის დევნილის სტატუსის მინიჭება კვლავ მოითხოვა.
„თურქეთში, სამწუხაროდ, არასწორი ბრალდება წამიყენეს, რომ თითქოს ტერორისტული ორგანიზაციის წევრი ვარ. არც იქ და არც აქ მე ტერორიზმთან კავშირი არ მქონია. ფეთულა გიულენს კი საერთოდ არ ვიცნობ, არასოდეს შევხვედრივარ. მე არანაირი დანაშაული არ ჩამიდენია, მაგრამ მეუბნებიან რომ ჩავიდინე, ბუნებრივია, თავს დამნაშავედ არ ვგრძნობ. არც ერთი თეთრი არ გადამირიცხავს რაიმე საეჭვო ორგანიზაციის ან პიროვნებისთვის, იმედი მაქვს ჩემი ოჯახი დევნილის სტატუსს მიიღებს“- განაცხადა ჩაბუქმა.
შეგახსენებთ, რომ მუსტაფა ემრე ჩაბუქი თურქეთის მხარის მოთხოვნით, მიმდინარე წლის 24 მაისს დააკავეს. თურქული მხარე მას ბრალად ფეტულა გიულენის იმ ორგანიზაციასთან თანაშრომლობაში ადანაშაულებს, რომელიც თურქეთში ტერორისტულ ორგანიზაციად მიიჩნევა.