გორის რაიონულ სასამართლოში დეპუტატ ირაკლი ხახუბიას შვილის, ბექა ხახუბიას დაღუპვის საქმეში ბრალდებული ყოფილი პოლიციელების სასამართლო პროცესი მიმდინარეობს.
პროცესზე ბრალდების მხარის ორი მოწმე დაიკითხა. მათ შორის ერთი ექსპერტი.

„დღევანდელ პროცესზე დაიკითხა ბრალდების მხარის მიერ წარმოდგენილი ერთ-ერთი მოწმე, რომელიც ამ ყველაფრის თვითმხილველი იყო. მან დაადასტურა სასამართლოს წინაშე გარკეული ფაქტები. გამოძიებისთვის მიცემულ ჩვენებასა და სასამართლოსთვის მიცემულ ჩვენებას შორის არსებითი განსხვავება არ ყოფილა“-განაცხადა პროკურორმა.

ბექა ხახუბია გორთან ახლოს, შეჯახებისას 17 მაისს გარდაიცვალა.

საპატრულო პოლიციის ყოფილ თანამშრომლებს ნუკრი ხაბელაშვილს, გიორგი სადაღაშვილს და ზურაბ რუსიშვილს ბრალი სსსკ-ის 116- ე და 333-ე მუხლებით წარედგინათ, რაც გაუფრთხილებლობით სიცოცხლის მოსპობას და სამსახურებრივი უფლებამოსილების გადამეტებას გულისხმობს.