შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის ინსტრუქტორებს ბათუმში სამართალდამცავი ოპერაციების (უსაფრთხო აბორდაჟის) ორკვირიანი კურსი ჩაუტარდათ. სწავლება აშშ-ს საელჩოს ექსპორტის კონტროლისა და საზღვრის უსაფრთხოების პროგრამის ორგანიზებითა და აშშ-ს სანაპირო დაცვის სამსახურის მხარდაჭერით განხორციელდა.
სასაზღვრო პოლიციის პრესსამსახურის ინფორმაციით, ტრენინგის მიზანი ინსტრუქტორების კვალიფიკაციის ამაღლება იყო.
სწავლებას აშშ-ს სანაპირო დაცვის სამსახურიდან მოწვეული ინსტრუქტორები უძღვებოდნენ. სასწავლო კურსი მოიცავდა როგორც თეორიულ, ასევე, პრაქტიკულ სავარჯიშოებს. ტრენინგზე განიხილეს ისეთი მნიშვნელოვანი საკითხები, როგორიცაა: პროფესიული კომუნიკაციები, საერთაშორისო სამართალი, შეჩერება-დაკავების პროცედურები, მაღალი რისკის შემცველი სამძებრო ოპერაციების ჩატარება, თავდაცვითი ტაქტიკა და სხვადასხვა ტიპის წვრთნები.
უწყების ცნობითვე, აბორდაჟის სასწავლო კურსი პირველად მიმდინარე წლის მარტში, ფოთში, საქართველოს შსს-ს სასაზღვრო პოლიციის სანაპირო დაცვის დეპარტამენტის უმცროს ოფიცრებსა და მიჩმანთა შემადგენლობას ჩაუტარდა, რის შემდეგაც შეირჩა ცხრა ინსტრუქტორი, რომლებიც მომავალში ბათუმის საზღვაო აკადემიაში თავად ჩაატარებენ უსაფრთხო აბორდაჟის კურსებს.
ტრენინგის ყველა მონაწილეს შესაბამისი სერტიფიკატი გადაეცა.