თბილისის მერი ნაძალადევის რაიონში, ურეკის ქუჩა N4-ში, ახლად გახსნილ 113-ე საბავშვო ბაღში იმყოფებოდა.

დავით ნარმანიამ თბილისის ბაგა-ბაღების მართვის სააგენტოს ხელმძღვანელ თემურ თორდინავასთან ერთად აღსაზრდელებს ახალი სასწავლო წლის დაწყება მიულოცა და საჩუქრად სახელმძღვანელოები გადასცა.

"ჩვენ დღეს, ამ კვირის განმავლობაში, მესამე ახალი საბავშვო ბაღი გავხსენით. თემქის მოსახლეობას წლების განმავლობაში აწუხებდა ეს პრობლემა, რადგან მათ ამ უბანში საბავშვო ბაღი არ ჰქონდათ. ამის გათვალისწინებით, აქ თანამედროვე, კომფორტული და ენერგოეფექტური ბაღი ყველანაირი წესის დაცვით ავაშენეთ. ამ ახალ ბაღში ყველა პირობა არსებობს იმისთვის, რომ პატარები ღირსეულად აღიზარდონ"- განაცხადა ნარმანიამ.

ბაგა-ბაღს, სადაც ამჟამად 350 აღსაზრდელი ირიცხება კეთილმოწყობილი და გამწვანებული შიდა ეზო აქვს. ეზოში ატრაქციონები და საპარკე ინვენტარია განთავსებული.

აღსანიშნავია ისიც, რომ 113-ე საბავშვო ბაღი ძველი, იმ დახურული ბაღის მიმდებარედ აშენდა, სადაც წლებია დევნილები ცხოვრობენ.

10-ჯგუფიანი ბაღი 400 აღსაზრდელზეა გათვლილი. ბაგა-ბაღში ამ დროისთვის დასაქმებული 75 ადამიანია.

ბაღის შენობა საერთაშორისო სტანდარტებს შეესაბამება და შეზღუდული შესაძლებლობის მქონე პირთათვისაც ადაპტირებულია. შენობაში გათვალისწინებულია ლიფტი და პანდუსები.

N113-ე ბაგა-ბაღი ერთ-ერთია იმ ხუთი ახალი ბაღიდან, რომელთა მშენებლობა გასულ წელს დაიწყო და ექსპლუატაციაში 2017 წლის შემოდგომაზე შევიდა.