აშშ-ს სენატის საერთაშორისო ურთიერთობების კომიტეტმა ე.წ. „მაგნიტსკის კანონი“ ერთხმად მოიწონა, იუწყება „ბი-ბი-სი“.

მიმდინარე თვის დასაწყისში „მაგნიტსკის კანონს“ დადებითი შეფასება წარმომადგენელთა პალატის საერთაშორისო ურთიერთობების კომიტეტმა მისცა.

კანონი ძალაში ორივე პლატისა და პრეზიდენტის მიერ ხელმოწერის შემდეგ შევა.

ივნისის დასაწყისში, კანონის არ მიღების მოწოდებით კონგრესს ამერიკულმა ბიზნეს-ლობიმ - აშშ-ს ტრანსნაციონალურმა კორპორაცია Engage--მა და საგარეო ვაჭრობის ეროვნულმა საბჭომ მიმართეს.

რუსეთის საგარეო საქმეთა სამინისტრო იმედოვნებს, რომ ამერიკის კონგრესი არ მოიწონებს „მაგნიტსკის კანონს“.

კანონის მიღების შემთხვევაში მოსკოვი ამერიკას „ადეკვატური“ ზომების მიღებით ემუქრება.

კანონის თანახმად, 60 რუსი ჩინოვნიკის მიმართ, რომლებიც სავარაუდოდ, 2009 წელს იურისტ სერგეი მაგნისტსკის რუსეთის საგამოძიებო იზოლატორში სიკვდილთან არიან კავშირში, სავიზო სანქციები დაწესდება, ხოლო ამერიკაში მათი აქტივები გაიყინება. კანონქვეშ შეიძლება მოექცნენ რუსი ფუნქციონერები, რომლებიც მკვლელობებთან, წამებასთან და ადამიანის უფლებათა სხვა დარღვევებთან არიან კავშირში. აშშ-ს კანონმდებლობის თანახმად, ჩინოვნიკების სრული სია გასაიდუმლოებული იქნება.