„დიდი ოცეულის“ წევრი ქვეყნების ლიდერებმა საერთაშორისო სავალუტო ფონდის რეზერვების 456 მლრდ აშშ დოლარამდე გაზრდის შესახებ მიიღეს გადაწყვეტილება.

ამის შესახებ მექსიკაში „დიდი ოცეულის“ სამიტის შედეგების თაობაზე მიღებულ დეკლარაციაშია ნათქვამი. ინფორმაციას „ბი-ბი-სი“ ავრცელებს.

„დიდი ოცეულის“ შემაჯამებელ დეკლარაციაში ლიდერებმა ევროზონის „ერთიანობისა და სტაბილურობის“ შენარჩუნების განზრახვა გამოთქვეს.

ლას-კაბოსის სამიტის მონაწილეებმა იმედი გამოთქვეს, რომ ევროზონასა და საბერძნეთის ახალ მთავრობას შორის თანამშრომლობა ნაყოფიერად წარიმართება.

„დიდი ოცეულის“ ლიდერებმა პირობა დადეს, რომ აქტიურად იბრძოლებენ მსოფლიოში შიმშილისა და უმუშევრობის წინააღმდეგ. ასევე, განაცხადეს, რომ თვალს მიადევნებენ მსოფლიოში ნავთობისა და სხვა ნედლეულის ფასს, რათა საჭიროების შემთხვევაში, ბაზრის სტაბილურობისთვის შესაბამისი ზომები მიიღონ.