იძულებით მონობაში მსოფლიოში 27 მილიონამდე ადამიანი იმყოფება. ამის თაობაზე ადამიანებით ვაჭრობის წინააღმდეგ  ბროძოლის შესახებ, აშშ-ს სახელმწიფო დეპარტამენტის ანგარიშშია ნათქვამი, იუწყება „ბი-ბი-სი“.

„საუკუნენახევრის შემდეგ, ამერიკასა და მსოფლიოში მონობა ჯერ კიდევ არსებობს და სამწუხაროდ, ბევრი მსხვერპლის ისტორია წარსულის ისტორიებს ჰგავს. მთელ მსოფლიოში 27 მილიონი ქალი, ბავშვი და მამაკაცია იმის მსხვერპლი, რასაც „ადამიანებით ვაჭრობა“ ჰქვია“ - ნათქვამია მოხსენებაში.

გასულ წელს მსხვერპლი კიდევ 42 ათასი ადამიანი გახდა.

როგორც ანგარიშშია ნათქვამი, რამდენიმე ქვეყანამ ადამიანებით ვაჭრობის წინააღმდეგ შესაბამისი ზომები მიიღო.

იმ ქვეყნების შავ სიაში, რომელთა ხელისუფლება საერთაშორისო ვალდებულებებს არ ასრულებს და პრობლემის მოსაგვარებლად სათანადო ძალისხმევას არ მიმართავს, ამჯერად სირია მოხვდა, სადაც წელიწადზე მეტია სამთავრობო ძალებსა და მეამბოხეებს შორის შეიარაღებული დაპირისპირებაა.