ამერიკა-რუსეთს შორის სავაჭრო ურთიერთობის შემზღუდველი ჯეკსონ-ვენიკის შესწორებების გაუქმება შეერთებული შტატების ადმინისტრაციის ერთ-ერთი პრიორიტეტია.

ეს განცხადება აშშ-ს პირველმა პირმა ბარაკ ობამამ მექსიკაში „დიდი ოცეულის“ სამიტზე რუს კოლეგასთან ვლადიმერ პუტინთან შეხვედრაზე გააკეთა.

ობამამ ეს განცხადება ზოგიერთი ამერიკელი პოლიტიკოსის იმ გამონათქვამების ფონზე გააკეთა, რომლებიც დისკრიმინაციული შესწორებების გაუქმებას ე.წ.„მაგნიტსკის კანონის“ მიღებას უკავშირებენ.

კანონის მიხედვით, რიგი რუსი ჩინოვნიკის მიმართ, რომლებიც სავარაუდოდ, 2009 წელს იურისტ სერგეი მაგნისტსკის რუსეთის საგამოძიებო იზოლატორში სიკვდილთან არიან კავშირში, სავიზო სანქციები დაწესდება, ხოლო ამერიკაში მათი აქტივები გაიყინება.

„მაგნისტკის კანონის“ პროექტს აშშ-ს სენატის საერთაშორისო საქმეების კომიტეტი განიხილავს, კონგრესის ანალოგიურმა კომიტეტმა ის უკვე მოიწონა.

რუსეთის ხელისუფლება ამტკიცებს, რომ კანონპროექტის დაკავშირება ჯეკსონ-ვენიკის შესწორებასთან არალოგიკური და არასწორია და საპასუხო ნაბიჯებით იმუქრება.

ობამამ თავის მისწრაფებაზე - მხარი დაუჭიროს ჯეკსონ-ვენიკის შეწორების გაუქმებას, პუტინთან საუბრისას ხაზი გაუსვა, რომ ორ ქვეყანას შორის სავაჭრო ბრუნვა უფრო დაბალია, ვიდრე შეიძლება იყოს.

პასუხად რუსეთის სახელმწიფოს ლიდერმა კოლეგას მადლობა უთხრა იმ მხარდაჭერისთვის, რაც შეერთებულმა შტატებმა რუსეთს მსოფლიო სავაჭრო ორგანიზაციაში გაწევრიანებაში გაუწია.

აშშ-ს პრეზიდენტის ადმინისტრაციას ხაზგასმით არაერთხელ განუცხადებია, რომ აუცილებლად მიიჩნევს, რაც შეიძლება სწრაფად გაუქმდეს ამერიკასა და რუსეთს შორის სავაჭრო შეზღუდვები, კერძოდ კი, ჯეკსონ-ვენიკის შესწორება, რომელიც სსრკ-ს წინააღმდეგ 1974 წელს შემოიღეს და რომელიც რუსი ექსპორტიორებისთვის შეზღუდვების დაწესებას ითვალისწინებდა.

„როიტერი“ კონგრესმენთა თანაშემწეებზე დაყრდნობით იუწყება, რომ „მაგნისტკის კანონის“ პროექტის ტექსტში ადმინისტრაციის წარმომადგენლებმა შესწორებები შეიტანეს იმასთან დაკავშირებით, რომ ზოგიერთი ჩინოვნიკის სახელი, რომლებზეც სანქციები გავრცელდება, საიდუმლოდ დარჩეს. წყაროს ცნობით, კანონს, შესაძლოა, რუსი ჩინოვნიკების გვარების შემცველი დანართი ჰქონდეს, რასაც აშშ-ს სახელმწიფო მდივანი თუ საჭიროდ ჩათვლის, გაასაიდუმლოებს.