საფრანგეთის, რუსეთისა და აშშ-ს პრეზიდენტებმა ლოს-კაბოსში „დიდი ოცეულის“ სამიტზე მათიანი ყარაბახის პრობლემასთან დაკავშირებით ერთობლივი განცხადება მიიღეს, იუწყება „რეგნუმი“.

„ჩვენ, ეუთო-ს მინსკის ჯგუფის თანათავმჯდომარე ქვეყნები - საფრანგეთი, რუსეთი და შეერთებული შტატები - მტკიცედ ვდგავართ მთიანი ყარაბახის კონფლიქტის მშვიდობიანი გზით მოგვარების პოზიციაზე. კონფლიქტის მხარეებმა პრობლემის მშვიდობიანი და მტკიცე მოგვარებისთვის აღარ უნდა გადადონ მიღებული მნიშვნელოვანი გადაწყვეტილებების შესრულების საკითხი. ვწუხვართ, რომ აზერბაიჯაინისა და სომხეთის პრეზიდენტებს არ გადაუდგამთ გადამჭრელი ნაბიჯები, 2011 წელს დოვილში ჩვენს მიერ მიღებული განცხადების შესასრულებლად“ - ნათქვამია განცხადებაში.

სახელმწიფოს მეთაურებმა სომხეთისა და აზერბაიჯანის პრეზიდენტებს 23 იანვარს სოჭის შეხვედრაზე აღებული ვალდებულებების შესრულებისკენ მოუწოდეს, რომლის თანახმად, მხარეებმა ყარაბახის კონფლიქტის დასარეგულირებლად მიღებული ძირითადი პრინციპების თაობაზე შეთანხმება უნდა დააჩქარონ.

პრეზიდენტების განცხადებით, მხარებმა თავი უნდა შეიკავონ მოლაპარაკებებზე მაქსიმალისტური პოზიციის დაფიქსირებისგან, პატივი სცენ 1994 წლის შეთანხმებას ცეცხლის შეწყვეტის თაობაზე და დაძაბულობის გაზრდის თავიდან ასაცილებლად, ადგილი არ მისცენ მტრულ რიტორიკას.

„მხოლოდ მშვიდობიანი დარეგულირება გახდის შესაძლებელს რეგიონის გადასვლას სტატუს-კვოდან უსაფრთხო და აყვავებულ მომავალში“ - ნათქვამია ფრანსუა ოლანდის, ვლადიმერ პუტინისა და ბარაკ ობამას განცხადებაში.

მათი თქმით, საფრანგეთი, რუსეთი და ამერიკა კვლავ მჭიდროდ ითანამშრომლებენ მხარეებთან, საბოლოო ჯამში კი, მათივე თქმით, მშვიდობის დამყარება დამოკიდებული იქნება მხარეთა მზადყოფნაზე -მიაღწიონ ურთიერთგაგებაზე და არა ცალმხრივ უპირატესობებზე საუბარზე დაფუძნებულ შეთანხმებას.