აზერბაიჯანული მხარის მიერ ყარაბახის საბრძოლო პოზიციების მისამართით სროლის დროს, გუშინ ყარაბახის თავდაცვის არმიის ვადიანი სამსახურის ჯარისკაცი 19 წლის არამ გულნაზარიანი დაიღუპა.  ამ ინფორმაციას მთიანი ყარაბახის თავდაცვის არმიის ინფორმაციის განყოფილება ავრცელებს.

გულნაზარიანმა სასიკვდილო ჭრილობა აღმოსავლეთით დისლოცირებული ნაწილების მიმართულებით დაწყებული სროლის დროს მიიღო.

ივნისის დასაწყისიდან სომხეთ-აზერბაიჯანის საზღვარსა და ყაარაბხისა და აზერბაიჯანული ძალების შეხების ხაზზე შეტაკებებმა ადამიანთა მსხვერპლი გამოიწვია.

ინფორმაციის განყოფილების ცნობით, აზერბაიჯანული დივერსიული დაჯგუფებების გაუვნებელყოფის მიზნით გატარებული ზომების შედეგად, სხვადასხვა მონაცემებით, განადგურებულია დაახლოებით 25 აზერბაიჯანელი დივერსანტი.

სომხური და ყარაბახის მხრიდან კი, დაიღუპა 4 და დაიჭრა 8 კაცი.

სამხრეთ კავკასიის ორ ხალხს შორის მთიან ყარაბახსა და მის მიმდებარე რაიონებზე ტერიტორიული პრეტენზიის გამო, კონფლიქტი 1988 წლიდან მიმდინარეობს. ამ ტერიტორიას სომხეთის შეიარაღებული ძალები აკონტროლებენ.

1994 წლის მაისიდან მხარეებმა ცეცხლის შეწყვეტის შესახებ შეთანხმებას მიაღწიეს და დღემდე ეუთო-ს მინსკის ჯგუფის ეგიდით და საფრანგეთის, აშშ-სა და რუსეთის მონაწილეობით წარუმატებელი მოლაპარაკებები მიმდინარეობს. ამ პერიოდიდან ორივე მხარეს დაიღუპა 25-30 ათასი ადამიანი.