ეგვიპტის რევოლუციური მოძრაობები საზოგადოებას ქაიროს ტაჰრირის მოედანზე უვადო აქციისკენ მოუწოდებენ. ამის შესახებ ადგილობრივი მედია იუწყება.

ოპოზიციის მოთხოვნებს შორისაა - საპრეზიდენტო არჩევნების შეჩერება, საპრეზიდენტო საბჭოს ჩამოყალიბება, სასამართლო სისტემის რეორგანიზაცია და სახალხო სასამართლოების ჩამოყალიბება, რომლებიც ყოფილი პრეზიდენტის ჰოსნი მუბარაქის რეჟიმის წარმომადგენლებზე ღია სახალხო პროცესებს ჩაატარებენ. საპრეზიდენტო არჩევნების მეორე ტური ეგვიპტეში 16-17 ივნისსაა დაგეგმილი.

გუშინ ახალგაზრდული და რევოლუციური მოძრაობების რამდენიმე ათასი წარმომადგენელი მუბარაქის რეჟიმის ყოფილი მაღალჩინოსნების მიმართ განაჩენის გამოცხადების შემდეგ ქაიროს ცენტრში შეიკრიბა. ისინი შსს-ს გენერლების მიმართ გამამართლებელ განაჩენს აპროტესტებდნენ და აცხადებდნენ, რომ მუბარაქისათვის და შს ყოფილი მინისტრისთვის სამუდამო პატიმრობა მსუბუქი სასჯელია.

ქაიროს გარდა, აქციები ეგვიპტის ყველა მსხვილი ქალაქის ცეტრალურ მოედნებზე გაიმართა.

ეგვიპტის ჯანდაცვის სამინისტროს მონაცემებით, გასული დღის განამვლობაში ჩხუბის, ჭყლეტაში მოყოლის, ასევე რადიაციის შედეგად ქაიროსა და ზოგიერთ პროვინციაში, საერთო ჯამში 113 ადამიანი დაზარალდა, 20-მდე სამედიცინო მკურნალობას გადის.

ქაიროს სისხლის სამართლის სასამართლომ 2011 წლის იანვრის რევოლუციის დროს მშვიდობიანი დემონსტრანტების დაღუპვაში მუბარაქი და შსს ექს-შეფი დამნაშავეებად სცნო და მათ სამუდამო პატიმრობა შეუფარდა, რის შემდეგაც, ეგვიპტის დედაქალაქში ყოფილი პრეზიდენტის მომხრეებსა და მოწინააღმდეგეებს შორის შეტაკებები დაიწყო.

2011 წლის სახალხო აჯანყების დროს, პოლიციასთან შეტაკებებისას 800-ზე მეტი ადამიანი დაიღუპა, ხოლო 2000-მდე დაშავდა.