პალესტინელ ტერორისტთან შეტაკების დროს დღეს ღაზას სექტორში გოლანის შტაბის ქართველი ებრაელი ჯარისკაცი გარდაიცვალა. ამის შესახებ ინფორმაციას „ynetnews.com“-ი ავრცელებს.
მათი ინფორმაციით, 21 წლის სერჟანტი ნეთანელ მოშიაშვილი, დღეს გამთენიისას, დაახლოებით 04:00 საათზე გარდაიცვალა.
ებრაული მედიის ინფორმაციით, შეტაკება მაშინ მოხდა, როდესაც ტერორისტმა ძლიერი ნისლით ისარგებლა, უსაფრთხოების ღობეს მიაღწია და ისრაელის საზღვრის გადაკვეთას ცდილობდა.
ნეთანელ მოშიაშვილი ღობეზე ავიდა და ტერორისტის დაკავებას შეეცადა, რომელმაც ჯარისკაცის მიმართულებით ცეცხლი გახსნა. მოსიაშვილი მძიმედ დაიჭრა და ექიმებმა მისი გადარჩენა ვერ შეძლეს.
მას დღეს, ნაშუადღევს, აშკელონის სამხედრო სასაფლაოზე დაკრძალავენ.
ტერორისტი უკვე იდენტიფიცირებულია. დადგინდა, რომ აჰმედ აბუ ნასერი სასაზღვრო სოფელ აბასანიდან იყო.
მედიაში გავრცელებული ინფორმაციით, დაახლოებით ერთი კვირის წინ, ამავე ტერიტორიაზე კიდევ ორი სამხედრო დაიჭრა.