მოსკოვის პოლიციამ მეტროს სადგურ „ბარიკადნაიასთან“ ოპოზიციის ბანაკი დაშალა და აქციის 30-მდე მონაწილე დააკავა, იუწყება „ლენტა რუ“.
რუსული საინფორმაციო სააგენტოების ცნობით, დაპატიმრებულთა შორისაა ოპოზიციური პარტიის „სოლიდარნოსტის“ ლიდერი ილია იაშინი. პოლიციისა და აქციის მონაწილეთა შეტაკების შედეგად ერთი სამართალდამცავი დაშავდა.
დაპირისპირების დროს, პოლიციის სპეცდანიშნულების რაზმის წარმომადგენლებსა და ოპოზიციის ლიდერებს დიმიტრი გუდკოვსა და ქსენია სობჩაკს შორის გამართული მოლაპარაკების შედეგად, პოლიციამ დემონსტრანტთა დაკავება შეწყვიტა.
გავრცელებული ინფორმაციით, ღამის გასათევად ოპოზიციის ბანაკში 300-მდე ადამიანი დარჩა.
„ბარიკადნაიასთან“ ოპოზიციის ბანაკი „ჩისტიე პრუდიზე“ დემონსტრაციის დარბევის შემდეგ შეიქმნა. გუშინ ღამით კი, პოლიციამ კარვებში მყოფი ხალხის დაშლა დაიწყო, რაც სამართალდამცავებმა სასამართლოს გადაწყვეტილებით ახსნეს.
როგორც ცნობილია, საპროტესტო აქციები მოსკოვში რამდენიმე კვირაა გრძელდება. ოპოზიციონერთა ლიდერების განცხადებით, ისინი მშვიდობიანი აქციების შეწყვეტას არ აპირებენ.