საბაჟო ადმინისტრირებისა და ტვირთების მონიტორინგის შესახებ გასული წლის ნოემბერში საქართველო-რუსთს შორის ხელმოწერილი შეთანხმება მსოფლიო სავაჭრო ორგანიზაციაში რუსეთის გაწევრიანებასთან ერთად შევა ძალაში.  ამის შესახებ განცხადებას რუსეთის საგარეო უწყება ავრცელებს.

რუსეთის საგარეო საქმეთა სამინისტროს წარმომადგენლის მარია ზახაროვას თქმით, ამ დროისთვის მოსამზადებელი ეტაპია.
მისივე განცხადებით, შვეიცარია, როგორც ნეიტრალური მესამე მხარე, რუსეთ-საქართველოს შეთანხმების შესაბამისად, კომპეტენტური კერძო კომპანიის შერჩევის პროცესშია. კომპანიას ორ ქვეყანას შორის რეგიონალური ვაჭრობის აუდიტი და ორი ქვეყნის საბაჟო სამსახურების მუშაობაში ხელის შეწყობა დაევალება.
„საქართველოს ტერიტორიაზე ამ კომპანიის მუშაობას ჩვენ დიდ მნიშვნელობას ვანიჭებთ. კომპანიის წარმომადგენლები ქართული საბაჟო ორგანოების მიერ პროცედურების შესრულებას იმ ტვირთებზე დააკვირდებიან, რომლებიც აფხაზეთში, რუსეთში და სამხრეთ ოსეთში ტრანსპორტირდება“ - აღნიშნა ზახაროვამ.
აღნიშნულთან დაკავშრებით, განცხადება დღეს საქართველოს საგარეო საქმეთა მინისტრის მოადგილემ ნინო კლანდაძემაც გააკეთა. მისი თქმით, საქართველო-რუსეთის საზღვარზე ტვირთბრუნვის მონიტორინგის განმახორციელებელი კომპანია შერჩეული არ არის და ამ საკითხზე შვეიცარული მხარე მუშაობს.

მსოფლიო სავაჭრო ორგანიზაციაში რუსეთის გაწევრიანების ფარგლებში, საქართველოსა და რუსეთს შორის გაფორმებული შეთანხმების თანახმად, საზღვრის სამ მონაკვეთზე - ფსოუზე, ლარსსა და როკზე, ტვირთბრუნვის მონიტორინგის განხორციელების მიზნით კერძო კომპანია უნდა შეირჩეს.