არაბთა ლიგის სამიტი, რომელიც სირიაში შექმნილი ვითარებიდან გამოსავლის ძიების გზების განხილვას მიეძღვნა, ბაღდადში დღეს დასრულდა. ინფორმაციას ამის შესახებ "ბი-ბი-სი" ავრცელებს.

სამიტზე არაბ ლიდერებს სირიის პრეზიდენტის ბაშარ ასადის გადადგომა არ მოუთხოვიათ.

მათი განცხადებით, დაუყოვნებლივ და წარმატებით უნდა შესრულდეს გაერო-სა და არაბთა ლიგის სპეციალური წარმომადგენლის კოფი ანანის სამშვიდობო გეგმა.

როგორც ცნობილია, ანანის გეგმა ითვალისწინებს მძიმე სამხედრო ტექნიკისა და სამთავრობო ჯარების გაყვანას, მოსახლეობისთვის ჰუმანიტარული დახმარების მიწოდებას, პოლიტიკური პატიმრების გათავისუფლებას და ჟურნალისტებისთვის პროფესიული მოვალეობის განხორციელებაში ხელშეწყობას.

პრეზიდენტი ბაშარ ასადი აცხადებს, რომ უზრუნველყოფს გეგმის განხორციელებას, თუმცა, აქვე ხაზს უსვამს, რომ აუცილებელია ბოლო მოეღოს უცხოეთიდან სირიელი ოპოზიციონერების დახმარებას.

აღსანიშნავია, რომ ერაყის დედაქალაქ ბაღდადში გუშინ, სამიტის პარალელურად ძლიერი აფეთქება მოხდა.