სამხრეთ ფლორიდაში ტროპიკული შტორმის „აიზეკის“ მოახლოებასთან დაკავშირებით საგანგებო სიტუაციაა გამოცხადებული.

bbc-ის ინფორმაციით, აიზეკი ფლორიდასა და ლუიზიანას შტატებს უახლოვდება. აშშ-ს მიერ გამოცხადებული საგანგებო სიტუაცია მისისიპსა და ალაბამას შტატებზეც გავრცელდა.

ტროპიკული შტორმის გამო, აშშ-ში ასობით ავიარეისი გაუქმდა. ქარიშხალი ნავთობისა და გაზის წარმოებასაც აფერხებს. ქარიშხლის შედეგად, ჰაიტიზე უკვე დაიღუპა ექვსი ადამიანი.

რესპუბლიკურმა პარტიამ სტიქიის გამო, ფლორიდის ქალაქ ტამპაში დაგეგმილი ღონისძიება გადადო. ალაბამას გუბერნატორმა რობერტ ბენტლიმ კი, რესპუბლიკელების ეროვნულ შეკრებაზე ვიზიტი გააუქმა. სავარაუდოდ, ლუიზიანას გუბერნატორი ბონ ჯინდალიც იმავეს გააკეთებს, რადგან შტატები საგანგებო რეაგირებისთვის ემზადება.

აშშ-ს ეროვნული ქარიშხლის ცენტრის თანამშრომლები აცხადებენ, რომ აიზეკის სიჩქარე საათში 105 კილომეტრს ორშაბათს მიაღწევს და დამანგრეველი ქარიშხლის ძალას 24 საათში შეიძენს.

აიზეკი საათში 105-170 კილომეტრის სიჩქარით ქარიშხლის კატეგორიას მიეკუთვნება. ის ფლორიდისა და ლუიზიანას სანაპიროებამდე სავარაუდოდ, სამშაბათს ან ოთხშაბათს მიაღწევს.