ტროპიკული ქარიშხალი „ისააკის“ ამერიკის სანაპიროებთან მიახლოების გამო ფლორიდის შტატში საგანგებო სიტუაციაა გამოცხადებული. ამის შესახებ „ასოშეიტედ პრესი“ იუწყება.

მეტეოროლოგებმა ქარიშხლის შესახებ შუა კვირაში განაცხადეს. ამჟამად ეპიცეტრი კუბასთან ახლოსაა.

მეტეოროლოგების ინფორმაციით, ქარიშხალი საათში 27 კმ სიჩქარით მოძრაობს, ქარის სიჩქარე კი, საათში 96 კმ-ს აღწევს.

სპეციალისტები არ გამორიცხავენ, რომ „ისააკი“ შესაძლოა, მეორე კატეგორიის ქარიშხალად იქცეს, როდესაც ქარის სისწრაფე დამანგრეველ მაჩვენებლს - საათში 160 კმ-ს მიუახლოვდება.

ხელისუფლება მოსახლეობას უსაფრთხოების ზომებზე ინფორმაციას აწვდის. ამასთანავე, საჭიროების შემთხვევაში, მოსახლეობის ევაკუაციის მიზნით სრულ მზადყოფნაშია ეროვნული გვარდიის ათეულობით თვითმფრინავი და ვერტმფრენი.

„ისააკი“ უკვე თავს დაატყდა ჰაიტის სამხრეთ ნაწილს და წინასწარი მონაცემებით, 3 ადამიანი იმსხვერპლა. ხელისუფლებამ მოსახლეობის უსაფრთხო ადგილებზე ევაკუირება მოახერხა. ჰაიტიზე ქარის სისწრაფემ საათში 100 კმ-ს მიაღწია. განადგურებულია სასოფლო-სამეურნეო სავარგულები და ინფრასტრუქტურა.