ე.წ. სამხრეთ ოსეთი მსოფლიო რუკაზე „დამოუკიდებელ სახელმწიფოდ“ საქართველოს დანაშაულებრივი პოლტიკის გამო გამოჩნდა.
ეს განცხადება რუსეთის პრემიერ-მინისტრმა დიმიტრი მედვედევმა. „რია ნოვოსტისთან“ ინტერვიუში, საქართველოს საგარეო საქმეთა სამინისტროს განცხადების შეფასებისას გააკეთა, რომელიც 8 აგვისტოს ცხინვალში რუსეთის პრემიერის ვიზიტს ეხებოდა.
მედვედევის თქმით, რუსეთის ხელისუფლებას თბილისმა არ უნდა ასწავლოს რომელ ქვეყნებში უნდა ჩავიდეს.
„რუსეთის პრემიერი ეწვია სამხრეთ ოსეთის რესპუბლიკას, შეხვდა მის ხელისუფლებას, განიხილეს ერთობილვი პროექტები. რა შუაშია საქართველოს საგარეო საქმეთა სამინისტრო?“ - აღნიშნა მედვედევმა.
მისივე შეფასებით, „დამოუკიდებელი სამხრეთ ოსეთი“ რუკაზე ოთხი წლის წინ გაჩნდა.
„მეტწილად საქართველოს ხელისუფლების დანაშაულებრივი პოლიტიკის გამო, ეს ქვეყანა რუკაზე ოთხი წლის წინ გაჩნდა და ამის შემდეგ, კიდევ ჩვენ გვასწავლიან ცხოვრებას?“ - აღნიშნავს მედვედევი.
საქართველოს საგარეო საქმეთა სამინისტროს განცხადებით, ცხინვალის ოკუპირებულ ტერიტორიაზე რუსეთის ფედერაციის პრემიერ-მინისტრის დიმიტრი მედვედევის ვიზიტი საქართველოს კანონმდებლობის, კერძოდ, „ოკუპირებული ტერიტორიების შესახებ“ კანონის დარღვევით განხორციელდა.
რუსეთ-საქართველოს ომის 4 წლისთავზე, 8 აგვისტოს პრემიერ-მინისტრი დიმიტრი მედვედევი ცხინვალში იმყოფებოდა, სადაც დე-ფაქტო პრეზიდენტს ლეონიდ თიბილოვს შეხვდა და სამხრეთ ოსეთის განვითარების პერსპექტივებზე ესაუბრა.