რუსეთის ფედერაციის საგამოძიებო კომიტეტი საქართველოს ხელისუფლებას რუსეთის არმიის დისკრედიტაციაში ადანაშაულებს.
ამის შესახებ ინფორმაციას რუსული მედია საგამოძიებო კომიტეტის მიერ რუსეთ-საქართველოს 2008 წლის აგვისტოს ომის მეოთხე წლისთავთან დაკავშირებით გავრცელებულ განცხადებაზე დაყრდნობით აკეთებს.
„რუსეთის სამშვიდო ბატალიონის დაცხრილვა საქართველოს მიერ კონტროლირებადი ტერიტორიიდან განხორციელდა, მაშინ, როდესაც ამის არავითარი საფუძველი არ არსებობდა. ჩვენ დეტალურად შევისწავლეთ ყველა მოქალაქის საჩივარი, ასევე, ის ვერსიაც შევისწავლეთ, თითქოს რუსეთის შეირაღებული ძალების სამხედრო მოსამსახურეები უკანონო ქმედებებს ჩადიოდნენ, რაც არ დადასტურდა. ამის თქმის საფუძველს იძლევა 2 ათასამდე დაკითხული სამხედრო მოსამსახურე, ასევე 100-მდე მშვიდობიანი მაცხოვრებელი. პირიქით, ისინი მოროდიორობასა და სახლების დაწვაში მძარცველებს ხელს უშლიდნენ“ – ნათქვამია განცხადებაში.
ამასთან, კომიტეტი აცხადებს, რომ რუსი სამხედროების მიერ ჩადენილი დანაშაულების შესახებ მტკიცებულებები ვერც ქართული მხარის კომპეტენტურმა ორგანოებმა ვერ წარმოადგინეს.
„გამოძიებამ მიიღო ჩვენება უკანონოდ არჩეული დიმიტრი სანაკოევის მთავრობაში მომუშავე პირებისგან, რომ მას შემდეგ, რაც რუსულმა ჯარმა ცხინვალიდან და მიმდებარე სოფლებიდან ქართული ჯარის გამოდევნა დაიწყო, საქართველოს ხელისუფლებამ რუსული ჯარის დისკრედიტაცია სცადა. დაღუპული ქართველი სამხედროების ცხედრებს სამხედრო ფორმას ხდიდნენ და სამოქალაქო ფორმას აცმევდნენ, თითქოს, მშვიდობიან მოსახლეობაში მსხვერპლი დიდი იყო“ – ნათქვამია საგამოძიებო კიმიტეტის განცხადებაში.
ამასთან, აქვე აღნიშნულია, რომ მათ მიერ მოპოვებული ინფორმაციის საფუძველზე, რუსეთის ჯარის გორსა და „საქართველოს საზღვართან“ განლაგებულ სოფლებში შესვლამდე, საქართველოს ხელისუფლებამ მოსახლეობის და მსოფლიო საზოგადოების შეცდომაში შეყვანის მიზნით, უკრაინელ დაქირავებულებს რუსეთის ჯარის ფორმა გადააცვა.
„მათი მონაწილეობით იღებდნენ ვიდეომასალას, თითქოს, რუსეთის ჯარი მოსახლეობაზე ძალადობდა და მოროდიორობდა“ – აცხადებენ კომიტეტში.
ამასთან, რუსული მხარე განცხადებაში სინანულს გამოთქვამს, რომ მიუხედავად საქართველოს ხელისუფლების უმაღლესი პირების და სამხედრო მაღალჩინოსნების მხრიდან ჩადენილი დანაშაულისა, რუსეთში მათ წინააღმდეგ სისხლის სამართლის საქმე ვერ აღიძვრება.
დღეს რუსეთ-საქართველოს 2008 წლის ომიდან 4 წელი შესრულდა, ომს რუსეთის მხრიდან საქართველოს ტერიტორიების 20%-ის ოკუპაცია მოყვა.
ოფიციალური ინფორმაციით, აგვისტოს ომის დროს შეიარაღებული ძალების 168 სამხედრო მოსამსახურე, პოლიციის 16 თანამშრომელი და 188 მშვიდობიანი მოქალაქე გარდაიცვალა, ხოლო 26 ათასი ადამიანი დევნილად იქცა.
იმავე წლის 26 აგვისტოს, რუსეთმა აფხაზეთისა და ე.წ. სამხრეთ ოსეთის „დამოუკიდებლობა“ ოფიციალურად აღიარა.