ოდესის ოლქის ყოფილი გუბერნატორის მიხეილ სააკაშვილის განცხადებით, თუკი ხელისუფლება 7 ნოემბერს მათ პირობებს არ შეასრულებს, უფრო მკაცრ მოთხოვნებს დააყენებენ. სააკაშვილის განცხადებით, ეს ქვეყანაში პოლიტიკური კლასის შეცვლა იქნება.

„ვინ უნდა შეცვალოს ისინი? ჩვენ გადავწყვიტეთ ამ მოედანზე, კარვებში დავიწყოთ “პოლიტიკური სპარტელების“ საგანმანათლებლო პროგრამის განხორციელება. აქ ახალ ადამიანებს ველოდებით, რომლებიც მომავალში უკრაინის ახალ ხელისუფლებას ჩამოაყალიბებენ. ეს ადამიანები არსებული ხელისუფლებისგან განსხვავებით, არ მოვლენ აქ ფულისა და პირადი გამორჩენის გამო. მათი მიზანი უკრაინაში საკანონმდებლო ცვლილებების განხორციელება, თამაშის წესების შეცვლა იქნება. ისინი შექმნიან ახალ პოლიტიკურ კლასს და ისტორიაში შევლენ,”-განაცხადა მიხეილ სააკაშვილმა.

რადასთან აქტივისტები უკვე ორ კვირაზე მეტია იმყოფებიან. შეკრებილები სადეპუტატო იმუნიტეტის გაუქმებას, ანტიკორუფციული სასამართლოს და ახალი საარჩევნო კანონის და კომისიის შექმნას მოითხოვენ.