საქართველოს თავდაცვის მინისტრის, ლევან იზორიას განცხადებით, მას პარტია „თავისუფალი დემოკრატების“ ინიციატივასთან დაკავშირებით ინფორმაცია ჯერ-ჯერობით არ აქვს.
მისივე თქმით, ხელისუფლება კონფლიქტის დარეგულირებასთან დაკავშირებულ გადაწყვეტილებებს სტრატეგიულ პარტნიორებთან ერთად იღებს
ამის შესახებ იზორიამ „თავისუფალი დემოკრატების“ ინიციატივასთან დაკავშირებით განაცხადა, რომელიც ოკუპანტ ქვეყანასთან მოლაპარაკებებში ჩართვის შემთხვევაში, არასახელმწიფოებრივი ინსტიტუტების დასჯას გულისხმობს.
„ინიციატივას არ ვიცნობ. იმითვის რომ კვალიფიციური პასუხი გაგცეთ უნდა ვიცნობდე მას. შესაბამისად, ამ ეტაპზე ყოველგვარი ინიციატივის განხილვისგან თავს იკავებ, მითუმეტეს რომ მასზე ინფორმაცია საერთოდ არ გამაჩნია.
გადაწყვეტილებებს, რაც დაკავშირებულია კონფლიქტის დარეგულირებასთან, ვიღებთ ჩვენს სტრატეგიულ პარტნიორებთან ერთად, მათი აქტიური თანამონაწილეობით. ეს ფორმატი აუცილებელია, რომ მომავალშიც შენარჩუნდეს. ჩვენ კონფლიქტის რეგულირებას ვხედავთ საერთაშორისო საზოგადოების ფართო ჩართულობით, ლეგიტიმაციის მაღალი ხარისხით. შესაბამისად, ეს კითხვის ნიშნის ქვეშ არასდროს არ დასმულა და ბუნებრივია ამ ფორმატში დიდი ძალისმევით მომავალშიც გავაგრძელებთ ჩვენს პარტნიორებთან თანამშრომლობას“- განაცხადა იზორიამ.
„თავისუფალი დემოკრატების“ ინიციატივის მიხედვით, ოკუპანტ ან საოკუპაციო მდგომარეობაში მყოფ ქვეყანასთან მოლაპარაკების უფლება მხოლოდ სახელმწიფო ინსტიტუტებს უნდა ჰქონდეთ, სხვა შემთხვევაში კერძო მოლაპარაკებების წარმოება სისხლის სამართლებრივად დასჯად ქმედებად უნდა ჩაითვალოს. „თავისუფალი დემოკრატები“ ამ საკითხს პარლამენტში უკვე საშემოდგომო სესიაზე განსახილველად დაარეგისტრირებს.