საქართველოს პარლამენტა დღეს 10 სახელმწიფოში პრეზიდენტის მიერ წარდგენილი საგანგებო და სრულუფლებიანი ელჩების კანდიდატურებს მხარი დაუჭირა.

კერძოდ, თურქეთში ელჩად დამტკიცდა ზურაბ პატარაძე, რომელიც 2011 წლიდან დღემდე თურქეთში საქართველოს გენერალური კონსული იყო;
ინდონეზიაში – საგარეო საქმეთა სამინისტროს აზიის, აფრიკის, ავსტრალიისა და ოკეანეთის ქვეყნების დეპარტამენტის დირექტორი ზურაბ ალექსიძე; შვეიცარიის კონფედერაციაში – ესპანეთის სამეფოში საქართველოს საელჩოში საგანგებო და სრულუფლებიანი დესპანი ირაკლი ყურაშვილი; არგენტინაში – საგარეო საქმეთა სამინისტროს ამერიკის დეპარტამენტის დირექტორის მოადგილე გელა სეხნიაშვილი; ბელარუსის რესპუბლიკაში – ამავე სახელმწიფოში საქართველოს საელჩოს საგანგებო და სრულუფლებიანი დესპანი დავით კოტარია; ბულგარეთში – კანადაში საქართველოს საგანგებო და სრულუფლებიანი ელჩი ლევან მეტრეველი; ეთიოპიის ფედერაციულ დემოკრატიულ რესპუბლიკაში – საგარეო საქმეთა სამინისტროს აზიის, აფრიკის, ავსტრალიისა და ოკეანეთის ქვეყნების დეპარტამენტის დირექტორის მოადგილე ვახტანგ ჯაოშვილი; ყატარში – ეკატერინე მაიერინგ-მიქაძე, რომელიც 2010 წლიდან დღემდე საგანგებო და სრულუფლებიანი ელჩია ქუვეითის სახელმწიფოში.

სამხრეთ აფრიკის რესპუბლიკაში კი, ელჩად ბექა დვალი დამტკიცდა, რომელიც დიდი ბრიტანეთისა და ჩრდილოეთ ირლანდიის გაერთიანებულ სამეფოში საქართველოს საელჩოსა და საერთაშორისო საზღვაო ორგანიზაციაში საქართველოს მუდმივი წარმომადგენლობის საგანგებო და სრულუფლებიანი დესპანი იყო. კანადაში საქართველოს ელჩი და საერთაშორისო სამოქალაქო ავიაციის ორგანიზაციაში (ICAO) საქართველოს მუდმივ წარმომადგენელი არგენტინაში საქართველოს უკვე ყოფილი ელჩი ალექსანდრე ლაცაბიძე იქნება.