მე-14 საერთაშორისო კონფერენციის „საქართველოს ევროპული გზა“ ფარგლებში, საქართველოს ვიცე- პრემიერმა, საგარეო საქმეთა მინისტრმა მიხეილ ჯანელიძემ შეხვედრა გამართა გერმანიის ფედერაციული რესპუბლიკის დელეგაციასთან ბუნდესტაგის დეპუტატების: ჰაინც-იოახიმ ბარხმანის და კრისტიან პეტრის, ასევე საგარეო საქმეთა ფედერალური სამინისტროს სამხრეთ კავკასიისა და ცენტრალური აზიის რეფერატის ხელმძღვანელის მიხაელ ზიბერტის შემადგენლობით.

საქართველოს ვიცე-პრემიერმა მადლობა გადაუხადა დელეგაციის წევრებს გერმანიის ბუნდესტაგის მიერ 2017 წლის 27 ივნისს მიღებული რეზოლუციის თაობაზე აღმოსავლეთ პარტნიორობის პროგრამისა და მასში მონაწილე ქვეყნების შესახებ.

შეხვედრისას მხარეებმა ისაუბრეს საქართველო-გერმანიის ორმხრივ ურთიერთობებში არსებულ დინამიკაზე, საქართველოს ევროპული და ევროატლანტიკური ინტეგრაციის პროცესზე, ოკუპირებული ტერიტორიების ირგვლივ შექმნილ ვითარებაზე, მეზობლებთან საქართველოს ურთიერთობასა და რეგიონში არსებულ მდგომარეობაზე. ასევე, ხაზი გაესვა 2017 წელს საქართველო-გერმანიის მეგობრობის წლის აღნიშვნისა და 2018 წლის ოქტომბერში ფრანკფურტის წიგნის საერთაშორისო ბაზრობაში საქართველოს საპატიო სტუმრის სტატუსით მონაწილეობის მნიშვნელობას.
მიხეილ ჯანელიძემ მადლობა გადაუხადა გერმანელ სტუმრებს ოფიციალური ბერლინის მიერ როგორც საქართველოს ევროპული და ევროატლანტიკური ინტეგრაციის კურსის, ისე სუვერენიტეტისა და ტერიტორიული მთლიანობის მხარდაჭერისათვის.
ამავე დროს, ვიცე-პრემიერმა ხაზგასმით აღნიშნა, რომ გერმანიის ისევე, როგორც სხვა მეგობარი და პარტნიორი ქვეყნების მხრიდან საქართველოს მიმართ გამოხატული საერთაშორისო თანადგომა განსაკუთრებულ მნიშვნელობას იძენს საქართველოს ტერიტორიების ოკუპაციასთან დაკავშირებული გამოწვევების ფონზე.
გერმანული დელეგაციის წევრებმა ვიცე-პრემიერს, საგარეო საქმეთა მინისტრს დაუდასტურეს გერმანიის ფედერაციული რესპუბლიკის მტკიცე მხარდაჭერა საქართველოს ტერიტორიული მთლიანობის, სუვერენიტეტის მიმართ და ევროპული ინტეგრაციის გაზე.