თბილისში, საქართველოს და ბულგარეთის რესპუბლიკის საგარეო საქმეთა სამინისტროებს შორის, მინისტრის მოადგილეების დონეზე, ორმხრივი პოლიტიკური კონსულტაციების მორიგი რაუნდი გაიმართა. საქართველოსმხრიდან კონსულტაციებს ხელმძღვანელობდა ვახტანგ მახარობლიშვილი, ხოლო ბულგარეთის მხრიდან - იური შტერკი.

შეხვედრაზე მხარეები მიესალმნენ აღნიშნული ფორმატის რევიტალიზაციის საკითხს. კმაყოფილებით შეფასდა ორ ქვეყანას შორის არსებული მჭიდრო პოლიტიკური და მეგობრული ურთიერთობები.

სამინისტროს პრესსამსახურის ინფორმაციით, კონსულტაციების ფარგლებში განხილულ იქნა ორმხრივი თანამშრომლობის ფართო სპექტრი. ხაზი გაესვა ურთიერთსასარგებლო თანამშრომლობას დარგობრივ უწყებებს შორის. ასევე, აღინიშნა სავაჭრო-ეკონომიკური და სატრანსპორტო მიმართულებებით მჭიდრო პარტნიორული ურთიერთობები და ამ კუთხით, აქცენტი გაკეთდა სამომავლო პერსპექტივებზე.

განხილულ იქნა საქართველოს ევროპული და ევრო-ატლანტიკური ინტეგრაციის პროცესების დღის წესრიგი. აღინიშნა შავი ზღვის მნიშვნელობა ორი ქვეყნის ურთიერთობების კონტექსტში და მხარეების სურვილი ამ მიმართულებით თანამშრომლობის შემდგომი განვითარების შესახებ.

ვახტანგ მახარობლიშვილმა მადლობა გადაუხადა ბულგარეთის მხარეს საქართველოს სუვერენიტეტისა და ტერიტორიული მთლიანობის, ასევე ევროპული და ევრო-ატლანტიკური ინტეგრაციის მტკიცე მხარდაჭერისთვის და ევროკავშირის სადამკვირვებლო მისიაში ბულგარეთის მიერ შეტანილი კონტრიბუციისათვის.

შეხვედრაზე საუბარი ასევე შეეხო საქართველოს ოკუპირებულ რეგიონებში არსებულ რთულ მდგომარეობას, განხილულ იქნა რუსეთის მხრიდან საქართველოს ოკუპირებულ ტერიტორიებზე განხორციელებული უკანონო ქმედებები და ამ კონტექსტში ხაზი გაესვა საერთაშორისო საზოგადოების აქტიური ჩართულობის მნიშვნელობას.