საქართველოსა და ესპანეთის სამეფოს შორის დაპლომატიური ურთიერთობების დამყარების 25 წლის იუბილე აღინიშნა.

საქართველოს საგარეო საქმეთა სამინისტროს ცნობით, ბოლო 25 წლის მანძილზე საქართველოსა და ესპანეთს შორის ჭეშმარიტად მეგობრული ურთიერთობები და წარმატებული თანამშრომლობა ჩამოყალიბდა, რომელიც საერთო ღირებულებებზე, ხედვასა და ურთიერთპატივისცემაზეა დაფუძნებული.
ამ ორ ქვეყანას შორის თანამშრომლობა პოლიტიკურ, ეკონომიკურ, კულტურულ-საგანმანათლებლო და სხვა სფეროებში დინამიკურად ვითარდება.

როგორც უწყებაში აცხადებენ, ესპანეთთან მზარდი სავაჭრო ბრუნვა, ბიზნესსექტორის ინტერესი საქართველოსადმი, ხალხთაშორისი ურთიერთობების გამყარება მისასალმებელია და ასევე, შთამბეჭდავია მხარეების მრავალმხრივ ფორმატში წარმატებული თანამშრომლობით მიღწეული შედეგები.

„საქართველოს მთავრობა მადლიერია ესპანეთის მიერ საქართველოს სუვერენიტეტისა და ტერიტორიული მთლიანობის, ასევე, ევროპული და ევრო-ატლანტიკური ინტეგრაციის მიმართ ურყევი მხარდაჭერისათვის და, რა თქმა უნდა, ესპანეთის მნიშვნელოვანი წვლილისათვის საქართველოს მოქალაქეებისათვის ევროკავშირთან უვიზო რეჟიმის ამოქმედების გადაწყვეტილების მიღების პროცესში.
ორ ქვეყანას შორის დიპლომატიური ურთიერთობების განმტკიცების გზაზე უმნიშვნელოვანესი მოვლენა იყო 2015 წელს, საქართველოში ესპანეთის მთავრობის მიერ საქმეთა დროებითი რწმუნებულის მოვლინება, უახლოეს მომავალში სრულფასოვანი საელჩოს გახსნის პერსპექტივით. დღეს, მსოფლიოში არსებული გამოწვევების ფონზე, განსაკუთრებით მნიშვნელოვანია ორმხრივი და მრავალმხრივი თანამშრომლობის კიდევ უფრო განმტკიცება, მსოფლიოში მშვიდობისა და გლობალური უსაფრთხოების საერთო მიზნების მისაღწევად
კიდევ ერთხელ, მივესალმებით საქართველოს-ესპანეთის ჭეშმარიტ და მტკიცე მეგობრულ ურთიერთობებს და გვჯერა, რომ კვლავაც დიდი ენთუზიაზმით გაგრძელდება ორმხრივი თანამშრომლობა ჩვენი ერების საკეთილდღეოდ“- განაცხადეს საქართველოს საგარეო საქმეთა სამინისტროში.