საქართველოს საგარეო საქმეთა მინისტრმა მიხეილ ჯანელიძემ საქართველოში უნგრეთის საგანგებო და სრულუფლებიანი ელჩის, შანდორ საბოს მისიის დასრულებასთან დაკავშირებით გამართულ ღონისძიებაში მონაწილეობა მიიღო , რომელზეც მინისტრმა დამსწრე საზოგადოებას სიტყვით მიმართა.
მან მადლობა გადაუხადა ელჩს საქართველოში მოღვაწეობისა და ორი ქვეყნის ურთიერთობის გაღრმავებაში შეტანილი წვლილისთვის.

მიხეილ ჯანელიძემ ხაზი გაუსვა საქართველოსა და უნგრეთს შორის არსებულ ტრადიციულ მეგობრულ ურთიერთობებს და ბოლო პერიოდში სხვადასხვა სფეროში თანამშრომლობის მზარდ დინამიკას, ინტენსიური ხასიათის მაღალი დონის ვიზიტებს და ხალხთა შორის კონტაქტების გაძლიერებას, რასაც ხელი შეუწყო ქუთაისიდან ბუდაპეშტის მიმართულებით უნგრული Wizz Air-ის დაბალბიუჯეტიანი ავიახაზების მეშვეობით პირდაპირი რეისების დანიშვნამ. მიხეილ ჯანელიძემ აღნიშნა ორ ქვეყანას შორის ეკონომიკური თანამშრომლობის მთავრობათშორისი კომისიის ჩამოყალიბების მნიშვნელობა, რაც სავაჭრო-ეკონომიკური კავშირების ახალ შესაძლებლობებს წარმოაჩენს. მან ასევე ხაზი გაუსვა განათლების სფეროში არსებულ წარმატებულ თანამშრომლობას და მადლობა გადაუხადა უნგრულ მხარეს იმ ახალი შესაძლებლობებისთვის, რასაც ქართველი სტუდენტებისთვის უნგრეთის მთავრობის გაცვლითი პროგრამები და სტიპენდიები იძლევა. საგარეო საქმეთა მინისტრმა ხაზი გაუსვა უნგრეთის აქტიურ მხარდაჭერას საქართველოს ევროპული და ევრო-ატლანტიკური მისწრაფებებისადმი და ასევე მადლობა გადაუხადა უნგრულ მხარეს საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის.