საქართველოს საგარეო საქმეთა სამინისტროს ორგანიზებით ხვალ განსაკუთრებული ღვაწლის მქონე დიასპორის წარმომადგენლების დაჯილდოების პირველი ოფიციალური ცერემონია გაიმართება.

ღონისძიების მიზანია საზღვარგარეთ მცხოვრები თანამემამულეების დამსახურების აღიარება, რომლებმაც პროფესიულ წარმატებებს მიაღწიეს ადგილსამყოფელ ქვეყნებში და ასევე, თავიანთი წვლილი შეიტანეს საქართველოს განვითარების საქმეში და საქართველოს იმიჯის, ქართული კულტურის, სპორტის და მეცნიერების პოპულარიზაციაში.

სპეციალურად შექმნილმა კომისიამ, რომელიც დაკომპლექტებული იყო საგარეო საქმეთა სამინისტროს, საქართველოს პარლამენტისა და ICMPD-ის წარმომადგენლების მიერ, 11 გამარჯვებული გამოავლინა შემდეგ ნომინაციებში: ჯილოდო მეცნიერების განვითარებაში შეტანილი წვლილისათვის; ქართული კულტურის პოპულარიზაციაში შეტანილი წვლილისათვის; ქართული სპორტის პოპულარიზაციაში შეტანილი წვლილისათვის; საქველმოქმედო საქმიანობაში შეტანილი წვლილისათვის; სახალხო დიპლომატიაში შეტანილი წვლილისათვის; საქართველოს უცხოელი მეგობარი. გამარჯვებულებს სიმბოლურად გადაეცემათ ექვთიმე თაყაიშვილის მიერ შეგროვებული და გადარჩენილი საგანძურის ერთ-ერთი ექსპონატის ასლი.

„დიასპორის დაჯილდოება 2017“-ს საქართველოს საგარეო საქმეთა მინისტრი მიხეილ ჯანელიძე გახსნის.

დაჯილდოების ოფიციალურ ცერემონიას საქართველოს საკანონმდებლო და აღმასრულებელი ხელისუფლების წარმომადგენლები და სხვა მოწვეული სტუმრები დაესწრებიან.

აღნიშნული ღონისძიება იმართება მიგრაციის საერთაშორისო ცენტრთან (ICMPD) და ევროკავშირის მიერ დაფინანსებულ პროექტთან ENIGMMA (მიგრაციის მართვის გაძლიერება საქართველოში) თანამშრომლობით.

აღსანიშნავია, რომ საქართველოს საგარეო უწყება პარტნიორ ორგანიზაციებთან ერთად აგრძელებს მუშაობას პროგრამაზე – „საქართველოს მაღალ-პროფილური დიასპორის ჩართულობა“. პროგრამის მიზანია საქართველოს განვითარების პროცესში საზღვარგარეთ მცხოვრები თანამემამულეების ჩართულობის ხელშეწყობა.