საქართველოს საგარეო საქმეთა მინისტრის მოადგილემ ხათუნა თოთლაძემ შეხვედრა გამართა თბილისში ვიზიტად მყოფ უნგრეთის საგარეო საქმეთა სამინისტროს სახელმწიფო მდივნის მოადგილესთან ჟოლტ ჩუტორასთან.

სამინისტროს პრესსამსახურის ინფორმაციით, შეხვედრაზე მხარეებმა ორმხრივ ურთიერთობებში არსებული პოზიტიური დინამიკა და სხვადასხვა სფეროში ნაყოფიერი თანამშრომლობა აღნიშნეს. ხაზი გაესვა საქართველოსა და უნგრეთს შორის დიპლომატიური ურთიერთობების დამყარების 25-ე წლისთავის მნიშვნელობას, რომელიც 2017 წელს აღინიშნება.

საიუბილეო თარიღის სათანადოდ წარმოჩენის მიზნით, ჟოლტ ჩუტორამ თბილისში უნგრეთის დღეების ორგანიზების სურვილი დააფიქსირა. სახელმწიფო მდივნის მოადგილის განცხადებით, მისი საქართველოში ვიზიტის ერთ-ერთი მთავარი მიზანი სწორედ აღნიშნული დღეების პროგრამის მომზადებაა, რომლის გამართვასაც უნგრული მხარე მიმდინარე წლის ბოლოს გეგმავს. ხათუნა თოთლაძე მიესალმა აღნიშნულ იდეას და ორგანიზატორებს მაქსიმალური მხარდაჭერა აღუთქვა საქართველოში უნგრეთის დღეების მომზადებისა და წარმატებით ჩატარების საქმეში.