პოლიტიკური სუბიექტის უკანონო შემოწირულობები მისთვის საარჩევნო რეგისტრაციაზე უარის თქმის საფუძველი ვერ გახდება.  ამის შესახებ დღეს პარლამენტის იურიდიულ საკითხთა კომიტეტის თავმჯდომარემ პავლე კუბლაშვილმა ჟურნალისტებს განუცხადა.
მისი თქმით, საუბარი იმაზე, რომ შესაძლოა, კოალიცია „ქართული ოცნება“ საარჩევნო რეგისტრაციაში გატარებული არ იქნეს, ჰიპოთეტურია და მასზე კომენტარს არ აპირებს.
„ხაზგასმით ვაცხადებ, რომ უკანონო შემოწირულობებისთვის გათვალისწინებულ შემთხვევებში საარჩევნო რეგისტრაციის გაუქმებას ან რეგისტრაციზე უარის თქმას, არც ერთი ნორმა არ ითვალისწინებს“ - განაცხადა კუბლაშვილმა.
ამასთან, ის დარწმუნებულია, რომ კოალიცია, ისევე როგორც ყველა სხვა პარტია, კანონის დაცვით ჩაატარებს კამპანიას, წარადგენს საარჩევნო რეგისტრაციისთვის საჭირო ინფორმაციას და კანონისადმი პასუხისმგებლობით იქნება გამსჭვალული.