კოალიცია "ქართული ოცნების" ერთ-ერთი ლიდერი, „თავისუფალი დემოკრატების“ წევრი ირაკლი ჩიქოვანი შინაგან საქმეთა სამინისტროს მიერ დღეს გავრცელებულ ვიდეომასალას, ხელისუფლების მხრიდან პროვოკაციად აფასებს.
როგორც ჩოქოვანმა ჟურნალისტებს განუცხადა, პარტია "თავისუფალი დემოკრატები" ისევე, როგორც კოალიცია "ქართული ოცნება", ღია ორგანიზაციებია, რომლებიც ყოველთვის კანონის ფარგლებში მოქმედებენ, ამიტომ მსგავსი ინფორმაციები, რაც შსს-ს ვიდეომასალაში იყო აღნიშნული, მათთვის საინტერესო არ არის.
"სამწუხაროა, რომ ჩვენი ორგანიზაციის წევრები, შესაძლოა, ამ პროვოკაციის მსხვერპლნი იყვნენ“ - აღნიშნა ჩიქოვანმა.
შინაგან საქმეთა სამინისტროს თანამშრომლებმა დღეს პოლიტიკური კოალიცია „ქართული ოცნების" აფხაზეთის ახალგაზრდული ორგანიზაციის თავმჯდომარე ირაკლი პერტენავა და პოლიტიკური პარტია „ჩვენი საქართველო - თავისუფალი დემოკრატების" აფხაზეთის ორგანიზაციის აღმასრულებელი მდივანი ზურაბ ფიფია დააკავეს.
შსს-ს ინფორმაციით, აღნიშნული პირები სამსახურებრივი უფლებამოსილების ბოროტად გამოყენებისთვის მზადებაში არიან ეჭვმიტანილნი.

შსს აცხადებს, რომ ირაკლი პერტენავა და ზურაბ ფიფია საქართველოს შინაგან საქმეთა სამინისტროს კონტრდაზვერვის დეპარტამენტის ოპერატიულ-ტექნიკური სამმართველოს I განყოფილების I ქვეგანყოფილების უფროსი ოპერატიული თანამშრომლის კახა ბაღათურიას „გადაბირებას" ცდილობდნენ.
დღესვე, შსს-მ შესაბამისი ფარული ვიდეო ჩანაწერიც გაავრცელა.