პოლიტიკური კოალიცია „ქართულ ოცნებაში“ შემავალი პოლიტიკური სუბიექტები სასამართლოს მიერ დაკისრებული ჯარიმის გადახდას არ აპირებენ.   ამის შესახებ „ნიუსპრესს“ პარტია „ჩვენი საქართველო - თავისუფალი დემოკრატების“ წარმომადგენელმა ვიქტორ დოლიძემ განუცხადა.

მისი თქმით, კოალიციაში საქალაქო სასამართლოს მიერ მიღებულ გადაწვეტილებას არ ეთანხმებიან, შესაბამისად „ხელისუფლებისთვის ფულის გადახდას“ არ გეგმავენ.

„ამ ჯარიმის დაკისრება მოსალოდნელი იყო და ეს ჩვენც და ივანიშვილმაც კარგად ვიცოდით“ - განაცხადა დოლიძემ.

ამასთან, დოლიძის თქმით, მიუხედავად იმისა, რომ „ბანკი ქართუს“ და „ქართუ ფონდის“ აქციები დაყადაღებულია, „ქართული ოცნება“ წინასაარჩევნო გეგმების შეცვალას არ აპირებს.

„ბანკი ქართუს“ დაყადაღება მდგომარეობას ერთგვარად გაართულებს, მაგრამ ეს იმას არ ნიშნავს, რომ ჩვენ მოქმედებას ვაჩერებთ“ - აღნიშნა მან.

თბილისის საქალაქო სასამართლომ, კონტროლის პალატის მონიტორინგის სამსახურის დადგენილების საფუძველზე, კოალიცია „ქართულ ოცნებაში“ შემავალი პოლიტიკური სუბიექტები და საზოგადოებრივი მოძრაობა „ქართული ოცნება“ 2 383 097 ლარით დააჯარიმა. სასამართლოს დადგენილებით, აღნიშნული თანხა ექვს სუბიექტს შორის - „რესპუბლიკური პარტია“, „თავისუფალი დემოკრატები“. „კონსერვატიული პარტია“, „მრეწველობა გადაარჩენს საქართველოს“, „ქართული ოცნება-დემოკრატიული საქართველო“ და საზოგადოებრივი მოძრაობა „ქართული ოცნება“ სოლიდარობის პრინციპით გადანაწილდება. დაკისრებული ჯარიმა პოლიტიკურმა სუბიექტებმა 7 დღის ვადაში უნდა გადაიხადონ. კონტროლის პალატის განცხადების თანახმად, შპს „მენეჯმენტ სერვისმა“ საკუთარი სახსრებით დაიქირავა და 476.614.51 ლარის სარემონტო სამუშაოები ჩაატარა საქართველოს სხვადასხვა რეგიონში არსებულ კოალიცია „ქართული ოცნების“ საოფისე ფართებში, რომლითაც დღემდე სარგებლობენ პოლიტიკური სუბიექტები - საზოგადოებრივი მოძრაობა „ქართული ოცნება“, „ქართული ოცნების“ კოალიციაში შემავალი პარტიები - „რესპუბლიკური პარტია“, „ეროვნული ფორუმი“, „დემოკრატიული მოძრაობა ერთიანი საქართველო“, „ქართული ოცნება- დემოკრატიული საქართველო“, „კონსერვატორული პარტია“ და „მრეწველობა გადაარჩენს საქართველოს“.