საქართველოს დამოუკიდებლობის დღესა და საქართველოსა და უნგრეთს შორის დიპლომატიური ურთიერთობების დამყარების 25 წლის აღსანიშნავად, ბუდაპეშტში ცნობილი ქართველი პიანისტის, UNESCO-ს მშვიდობის არტისტის ელისო ბოლქვაძისა და ფერენც ლისტის სახელობის კამერული ორკესტრის ერთობლივი კონცერტი გაიმართა.

კონცერტის დაწყებამდე დამსწრე საზოგადოებას სიტყვით მიმართა უნგრეთში საქართველოს საგანგებო და სრულუფლებიანმა ელჩმა ზაზა კანდელაკმა, რომელმაც ისაუბრა ქართულ-უნგრულ ურთიერთობებზე, ხაზი გაუსვა საქართველოს მისწრაფებებსა და მიღწევებსევროპული და ევრო-ატლანტიკური ინტეგრაციის კუთხით და მადლობა გადაუხადა უნგრეთის მთავრობას საქართველოს ტერიტორიული მთლიანობისა და სუვერენიტეტის მტკიცე მხარდაჭერისათვის.

ელისო ბოლქვაძემ და ფერენც ლისტის სახელობის კამერულმა ორკესტრმა შეასრულეს ბახის, ჰაიდნისა და მოცარტის ნაწარმოებები.

ღონისძიებას უნგრეთის პოლიტიკური და კულტურული წრეებისა და დიპლომატიური კორპუსის წარმომადგენლები ესწრებოდნენ .

გარდა ამისა, საქართველოს დამოუკიდებლობის დღისა და საქართველოსა და უნგრეთს შორის დიპლომატიური ურთიერთობების დამყარების 25 წლის იუბილეს აღსანიშნავი ღონისძიებების ფარგლებში, გამომცემლობა „L'Harmattan“-ის მიერ, სერიაში „მსოფლიო ლიტერატურის ულამაზესი ნიმუშები“, უნგრეთში ცნობილი ქართველი პოეტის დავით მაღრაძის პოემა „ჯაკომო პონტი“ გამოიცა, რომლის უნგრულენოვანი თარგმანი ეკუთვნის ქართველოლოგ ჰაინალკა ბაბირაკს.