საქართველოს დამოუკიდებლობის დღის აღსანიშნავად, საქართველოს საელჩომ ლატვიის რესპუბლიკაში საზეიმო მიღება გამართა. ღონისძიება გაიხსნა საქართველოს და ლატვიის ჰიმნების შესრულებით, რის შემდეგაც საქართველოს ელჩმა ლატვიის რესპუბლიკაში თეიმურაზ ჯანჯალიამ დამსწრე საზოგადოებას მისასალმებელი სიტყვით მიმართა.

მიღებაზე სპეციალურად მოწვეულმა ლატვიის მუსიკალური აკადემიის სიმფონიურმა კვარტეტმა სხვადასხვა ცნობილი კომპოზიტორების კლასიკური ნაწარმოებები შეასრულა.

მიღებაზე მოწვეულ სტუმრებს საშუალება ჰქონდათ დაეგემოვნებინათ ქართული კერძები, ღვინო და ბრენდის ნაირსახეობები.

ღონისძიებას დაესწრნენ ლატვიაში აკრედიტებული დიპლომატიური კორპუსის, ლატვიის მთავრობის, პარლამენტის, კულტურის, სამეცნიერო, სპორტის, მედიცინის და სხვა სფეროების წარმომადგენლები, ასევე ლატვიაში მცხოვრები ქართული დიასპორა.