შვედეთში საზეიმო მიღებით აღინიშნა საქართველოს დამოუკიდებლობის დღე და საქართველოსა და შვედეთს შორის დიპლომატიური ურთიერთობების დამყარების 25 წლისთავი.

მიღების ფარგლებში, ქ. სტოკჰოლმში მცხოვრები ქართველებით დაკომპლექტებული ანსამბლის „ქ. სტოკჰოლმის წმინდა გიორგის გუნდი“ მიერ შესრულდა საქართველოსა და შვედეთის ეროვნული ჰიმნები, რის შემდეგაც სტუმრებს მისასალმებელი სიტყვით მიმართა საქართველოს ელჩმა შვედეთში მალხაზ კაკაბაძემ. მან ისაუბრა საქართველო-შვედეთის ურთიერთობებზე, მადლობა გადაუხადა შვედურ მხარეს ურყევი თანადგომისთვის და მომავალი, უფრო ღრმა თანამშრომლობის იმედი გამოთქვა.

ღონისძიებაზე საქართველოს ტურიზმის ეროვნული ადმინისტრაციის წარმომადგენელმა საქართველოს ტურისტულ პოტენციალზე ისაუბრა.

საზეიმო მიღებაზე მოწვეულ სტუმრებს შორის იყვნენ შვედეთის აღმასრულებელი და საკანონმდებლო ხელისუფლების, საგარეო საქმეთა სამინისტროს, საინვესტიციო სააგენტოების და სავაჭრო პალატების წარმომადგენლები, შვედეთში აკრედიტებული დიპლომატიური მისიების ხელმძღვანელები, ბიზნესწრეების წარმომადგენლები, საქართველოს შვედ მეგობართა საზოგადოების წევრები, კულტურული მოღვაწეები, არასამთავრობო სექტორის ექსპერტები, ჟურნალისტები და შვედეთში მცხოვრები ქართული დიასპორის წარმომადგენლები. ღონისძიებას ასევე ესწრებოდა საქართველოს ტურიზმის ეროვნული ადმინისტრაციის დელეგაცია.

მიღებაზე დამსწრე საზოგადოებას საელჩო ქართული ღვინითა და კერძებით გაუმასპინძლდა.

გარდა ამისა, შვედეთში საქართველოს საელჩოში გაიმართა საქართველოს ტურისტული პოტენციალის შვედეთში პოპულარიზაციისადმი მიძღვნილი პრეზენტაცია, რომელიც საქართველოს დამოუკიდებლობის დღესა და საქართველო-შვედეთს შორის დიპლომატიური ურთიერთობების დამყარების 25-ე იუბილესთან დაკავშირებით საელჩოს მიერ დაგეგმილი ღონისძიებების ფარგლებში ჩატარდა.

ღონისძიებაში მონაწილეობის მისაღებად საქართველოდან მოწვეულნი იყვნენ საქართველოს ტურიზმის ეროვნული ადმინისტრაციის, საქართველოს ტურისტული კომპანიების „Caucasus Travel", „Georgian Wonders", „Visit Georgia", აგრეთვე კურორტის "Lopota Lake Resort and Spa" წარმომადგენლები, რომლებმაც შეხვედრები გამართეს შვედეთის ბიზნესწრეების წარმომადგენლებთან.

შეხვედრის დასაწყისში, საელჩოს სტუმრებს სიტყვით მიმართა საქართველოს ელჩმა შვედეთში, რომელმაც ისაუბრა ტურიზმის განვითარებაში საქართველოს მთავრობის მიღწევებზე და სამომავლო მიზნებზე. ღონისძიებაზე ასევე, მისასალმებელი სიტყვით წარსდგა საქართველო-შვედეთის მეგობრობის ასოციაციის თავმჯდომარე სვენ ჰოლმსტრომი. მან ყურადღება ხალხთაშორისი კონტაქტების მნიშვნელობაზე გაამახვილა.

საქართველოს ტურიზმის ეროვნული ადმინისტრაციის წარმომადგენელმა დეტალურად ისაუბრეს ტურიზმის სფეროში საქართველოში არსებული შესაძლებლობებზე და საქართველოში უცხოელ ვიზიტორთა რაოდენობის სწრაფად ზრდის ტენდენციებზე.

ღონისძიების ფარგლებში, ავიაკომპანიის „Atlasglobal" სტოკჰოლმის წარმომადგენლობის დირექტორმა აისე მისირლიმ ხაზი გაუსვა ამ ავიაკომპანიის დაინტერესებას სკანდინავიის რეგიონიდან საქართველოში ტურისტული ნაკადის ზრდის ხელშეწყობაში და ქართველ დაშვედ ტუროპერატორებს სტოკჰოლმიდან და კოპენჰაგენიდან, თბილისის მიმართულებით, ახლადგახსნილი ავიარეისების განრიგის და ტარიფების შესახებ ინფორმაცია მიაწოდა.