სტამბოლში შავი ზღვის ეკონომიკური თანამშრომლობის ორგანიზაციის (BSEC) დაარსების 25-ე წლის იუბილესთან დაკავშირებით საგარეო საქმეთა მინისტრების საბჭოს (CMFA) სპეციალური სხდომა გაიმართა, რომელშიც საქართველოს დელეგაციამ მონაწილეობა მიიღო მინისტრის მოადგილის დავით ჯალაღანიას ხელმძღვანელობით.

დავით ჯალაღანიამ თავის გამოსვლაში კოლეგებს გააცნო საქართველოს მიერ ეკონომიკური განვითარებისა და რეგიონული თანამშრომლობის მხრივ მიღწეული შედეგები და საქართველოს მთავრობის გეგმები მასშტაბურსატრანსპორტო და ენერგეტიკულ პროექტებში მონაწილეობასთან დაკავშირებით.

მინისტრის მოადგილემ განსაკუთრებით ხაზი გაუსვა რეგიონში უსაფრთხოებისა და კონფლიქტების დარეგულირების მხრივ არსებულ პრობლემებს, რომლებიც აფერხებენ BSEC-ის წევრ ქვეყნებს შორის ეფექტური ეკონომიკური თანამშრომლობის განვითარებასა და ერთობლივი ინფრასტრუქტურული პროექტების განხორციელებას.
ასევე აღინიშნა, რომ მიზანშეწონილია თანამედროვე რეალიებისა და გამოწვევების გათვალისწინებით აქტიურად დაიწყოს BSEC-ის ორგანიზაციის რეფორმირების პროცესი, რათა მიღწეულ იქნას BSEC-ის წესდებით გათვალისწინებული მიზნები და ამოცანები.
მინისტრის მოადგილემ მონაწილეობა მიიღო BSEC-ის მუდმივმოქმედი საერთაშორისო სამდივნოს ახალი ოფისის გახსნის ცერემონიალში და წარმატება უსურვა სამდივნოს სამომავლო საქმიანობაში.
BSEC-ის საგარეო საქმეთა მინისტრების საბჭოს სპეციალური სხდომის ფარგლებში, ალბანეთის მხარის თხოვნით, მინისტრის მოადგილემ დავით ჯალაღანიამ გამართა ორმხრივი შეხვედრა ალბანეთის რესპუბლიკის საგარეო საქმეთა მინისტრის მოადგილესთან ჰალილ ჰისენისთან (Halil Hyseni). მხარეებს შორის განხილულ იქნა ორმხრივ და მრავალმხრივ ფორმატებში თანამშრომლობის განვითარების მიმართულებები.
შავი ზღვის ეკონომიკური თანამშრომლობის ორგანიზაციის (BSEC) დაარსების 25-ე იუბილესთან დაკავშირებით, მ.წ. 22 მაისს გაიმართა BSEC-ის წევრი სახელმწიფოების მეთაურთა სამიტი, რომელსაც თავმჯდომარეობდა თურქეთის რესპუბლიკის პრეზიდენტი რეჯეფ თაიფ ერდოღანი.

სამიტზე საქართველოს დელეგაციას ხელმძღვანელობდა საქართველოს პირველი ვიცე-პრემიერი, ფინანსთა მინისტრი დიმიტრი ქუმსიშვილი.
სამიტის ფარგლებში მიღებულ იქნა შავი ზღვის ეკონომიკური თანამშრომლობის ორგანიზაციის (BSEC) დაარსების 25-ე საიუბილეო დეკლარაცია, რომლის ტექსტი შეთანხმდა საგარეო საქმეთა მინისტრების საბჭოს (CMFA) სპეციალურ სხდომაზე.
საქართველოს დელეგაციის მოთხოვნით, დეკლარაციაში კიდევ ერთხელ დაფიქსირდა BSEC-ის წევრი ქვეყნების მიერ გაეროს წესდებით, ჰელსინკის დასკვნითი აქტის და ახალი ევროპისათვის პარიზის ქარტიით გათვალისწინებული პრინციპებისა და წესების დაცვის მხარდაჭერა.
ქართული მხარის წინადადებით, BSEC-ის სამიტის დეკლარაციაში პირველად იქნა დაფიქსირებული დებულებები შავ ზღვაში საერთაშორისო სამართლის პრინციპების გათვალისწინებით უსაფრთხო ნავიგაციის უზრუნველყოფისა და BSEC-ის წევრ სახელმწიფოებში ქვეყნის შიგნით იძულებით გადაადგილებულ პირთა (Internally Displaced Persons - IDP) უფლებების დაცვის აუცილებლობაზე.