„ლეიბორისტული პარტიის“ ერთ-ერთი ლიდერი სოსო შატბერაშვილი სოფლის მეურნეობის მინისტრს ქართლსა და კახეთში მიწების მორწყვის პრობლემით დაინტერესებისკენ მოუწოდებს.
როგორც შატბერაშვილმა დღეს გამართულ ბრიფინგზე განაცხადა, მაშინ როდესაც მიხეილ სააკაშვილი საკუთარ ვენახში მოწეული მოსავლით ტკბება, ამ დროს ქართლისა და კახეთის სოფლების მოსახლეობას უწყლობის პრობლემა აწუხებთ.
მისი თქმით, ათეულათასობით ჰექტარ სავარგულს განადგურების საფრთხე ელის, რაც შიმშილით სიკვდილის ტოლფასია.
„2003 წლის შემდეგ სოფელს ისედაც უამრავი პრობლემა გაუჩნდა. გლეხს არ გააჩნია ტექნიკა, არ აქვს დიზელის საწვავის შეძენის ფული, არ აქვს შხამქიმიკატებით მიწის დამუშავების საშუალება და ახლა ამას უწყლობაც ემატება“ - აღნიშნა შატბერაშვილმა.
მისივე თქმით, სოფლის მეურნეობის მინისტრმა ქართლისა და კახეთის მიწების მორწყვის შესახებ განკარულება დაუყოვნებლივ უნდა გასცეს და ირიგაციის პროცესს უშუალოდ ადგილიდან უხელმძღვანელოს.