კოალიცია „ქართული ოცნების“ ლიდერს ბიძინა ივანიშვილს ჯარიმის ნებაყოფლობით გადახდის ვადა ხვალ ეწურება.
როგორც „ნიუსპრესს“ ადვოკატმა შალვა თადუმაძემ განუცხადა, ბიძინა ივანიშვილმა აღსრულების ეროვნულ ბიუროში ინფორმაცია საკუთრებაში არსებული ქონების შესახებ უკვე წარადგინა.
„სააღსრულებლოში ინფორმაცია უკვე წარდგენილია, თუმცა, მე არ მაქვს უფლება და ვალდებულება აღნიშნული ინფორმაცია გავამჟღავნო“ - განუცხადა „ნიუსპრესს“ თადუმაძემ.
ბიძინა ივანიშვილმა აღსრულების ეროვნული ბიუროსგან ერთკვირიანი ვადა ჯარიმის ნებაყოფლობით გადასახდელად 19 ივნისს მიიღო. ასევე, მას 1 კვირის ვადაში აღსრულების ბიუროში უნდა წარედგინა ინფორმაცია საკუთრებაში არსებული ქონების შესახებ.
კოალიცია „ქართული ოცნების“ ლიდერი არ გამორიცხავს, რომ ხელისუფლებამ მის საკუთრებაში არსებული უძრავი ქონება დააყადაღოს. როგორც ივანიშვილმა აღნიშნა, მას თავის სახელზე უძრავი ქონება აქვს საჩხერეში, ბაკურიანსა და ურეკში.
მისივე თქმით, ის ქართულ კომპანიებში წილს არ ფლობს. რაც შეეხება
„ქართუ ბანკს“, მან თავისი წილი 2 მაისს უფროს შვილს უტას გადასცა. ივანიშვილი სასამართლოს მიერ დაკისრებული ჯარიმის გადახდას არ აპირებს, რადგან მიაჩნია, რომ ის არაკანონიერია.
ივანიშვილის ჯარიმა 74 325 065 ლარს შეადგენს. თავდაპირველდ საქალაქო სასამართლომ მას ჯამში 148 650 131 ლარიანი ჯარიმა დააკისრა ორი აქტის საფუძველზე, თუმცა, თანხა მოგვიანებით სააპელაციო სასამართლომ გაანახევრა. პირველ შემთხვევაში, სასამართლომ ივანიშვილი წინასაარჩევნოდ, პოლიტიკური მიზნით, ამომრჩევლისთვის ,,გლობალ ტვ“-ს სატელიტური ანტენების უსასყიდლოდ გადაცემაში დაადანაშაულა.
მეორე შემთხვევაში კი, სასამართლომ განმარტა, რომ ივანიშვილმა საკუთარი მატერიალური სახსრებით პოლიტიკური და საარჩევნო მიზნებისთვის მისი კუთვნილი კომპანიების ,,ბურჯისა” და ,,ელიტა ბურჯის” სახელზე 239 ერთეული ავტოსატრანსპორტო საშუალება დაარეგისტრირა, რომელთა გამოყენებითაც პოლიტიკურ გაერთიანება „ქართული ოცნება-დემოკრატიული საქართველოს” მომსახურებას, ფაქტობრივად, უსასყიდლოდ უწევდა.
ადვოკატები საქმის გასაჩივრებას სტრასბურგის სასამართლოში გეგმავენ.