ევროკავშირსა და საქართველოს შორის ადამიანის უფლებების საკითხებზე დღეს დიალოგის მორიგი რაუნდი გაიმართება. ამის შესახებ  საქართველოში ევროკავშირის წარმომადგენლობის ხელმძღვანელის ელჩის ფილიპ დიმიტროვის განცხადებაშია ნათქვამი.
განცხადების თანახმად, ევროკავშირსა და საქართველოს შორის ადამიანის უფლებების საკითხებზე დიალოგი ორმხრივი პროცესია, რადგან ის ცალკეული საქმეების ჩათვლით, ისეთი საკითხების განხილვის საშუალებას იძლევა, რომელიც შეშფოთებას იწვევს.
როგორც განცხადებიდან ირკვევა, დიალოგის წინა რაუნდის შემდეგ, სამართლებრივი რეფორმის, აღმსარებლობის თავისუფლების, იძულებით გადაადგილებულ პირთა ხელშეწყობისა და სახალხო დამცველის აპარატის მიერ დამოუკიდებელი მონიტორინგის განხორციელების მიმართულებით წინსვლა გაგრძელდა. ასევე, აღინიშნა, რომ 2011 წლის მაისის შემდეგ ჩატარებული დემონსტრაციების უმეტესობა მოწესრიგებულად მიმდინარეობდა.
„მოახლოებული საპარლამენტო არჩევნების კონტექსტში ევროკავშირი მოელის, რომ შემდგომი წინსვლა მიღწეული ტოლერანტული, პლურალისტული პოლიტიკური კულტურის ჩამოყალიბებისა და ზეწოლისა ან სამსახურიდან დათხოვნასთან დაკავშირებულ განცხადებებზე სწრაფად რეაგირების მიმართულებით იქნება“ - ნათქვამია დიმიტროვის განცხადებაში.
დისკუსიები ასევე, საკითხების ფართო სპექტრს შეეხება, მათ შორისაა, პატიმართა დიდი რაოდენობა, სამართალდამცავი ორგანოების თანამშრომლების ანგარიშვალდებულება, უმცირესობები, სამოქალაქო საზოგადოების ფუნქციონირება და ადამიანის უფლებების მდგომარეობა სეპარატისტულ რეგიონებში.
„ევროკავშირი შრომითი უფლებებისა და სოციალური დიალოგის ხელშეწყობის საკითხს კვლავ წამოჭრის, განსაკუთრებით, არსებული პრეფერენციების გენერალიზებული სისტემისა (GSP+) და ღრმა და ყოვლისმომცველი თავისუფალი ვაჭრობის შესახებ შეთანხმების შესახებ მოლაპარაკებების კონტექსტში“ - აცახდებს ფილიპ დიმიტროვი.
განცხადების თანახმად, დიალოგის მორიგი რაუნდის წინ, ევროკავშირი სამოქალაქო საზოგადოების მონაწილეობით სემინარს გაუწევს ორგანიზებას, რომელზეც ყურადღება სამართლისა და შრომის საკითხებზე გამახვილდება.