საქართველოს პრეზიდენტმა მიხეილ სააკაშვილმა თვითმმართველობების წარმომადგენლებს სამაგალითო მუშაობისკენ მოუწოდა.
მან ხელისუფლების წარმომადგენლებს მიმართა და აღნიშნა, რომ გარკვეული ძალები ცდილობენ მათი მუშაობის შესახებ სიცრუე გაავრცელონ, ამიტომ ყველაზე სწორი გზა სიცრუის დასამარცხებლად სამაგალითო მუშაობაა.
„სამაგალითო მუშაობაა საჭირო ხალხის თავისუფალი არჩევანის დასაცავად და იმისათვის, რომ ვერცერთმა პოლიტიკურმა ძალამ, მათ შორის ვერც სახელისუფლებომ, ვერ შეძლოს უკანონო გავლენის განხორციელება ამომრჩევლის ნება-სურვილზე, არ დავუშვათ ადმინისტრაციული რესურსის ბოროტად გამოყენება, ამავე დროს წუთითაც კი არ შეჩერდეს სამთავრობო მუშაობა, რადგან ჩვენ გვაქვს ჩვენი გეგმები და ამ აღმშენებლობის გეგმებს ვერ შევაჩერებთ“- განაცხადა სააკაშვილმა და აღნიშნა, რომ დიდი გეგმების განხორციელება არც არჩევნების წინ დაწყებულა და არც არჩვენებით არ დასრულდება.
„როგორც ქვეყნის მეთაური, ამაყი ვარ და მაქვს თქვენი იმედი, რომ საქართველოს ყველა რეგიონში პირუთვენალად დაიცავთ ჩვენი ხალხის ამ ფუნდამენტურ უფლებას. მე მაქვს თქვენი და მთელი საქართველოს საზოგადოების იმედი. კანონის უზენაესობა დაცული იქნება და დარწმუნებული ვარ, ჩვენი დემოკრატია მორიგ გამარჯვებას იზეიმებს“- განაცხადა სააკაშვილმა.
მისივე განცხადებით, საამაყოა ისიც, რომ სახელმწიფო ინსტიტუტებს შესწევთ ძალა დიდ გამოწვევაზე რეგირება მოახდინონ.
როგორც სააკაშვილმა აღნიშნა, სისტემა ჩაკეტვის ნაცვლად, კიდევ უფრო იხსნება.
„ჩვენ შევინარჩუნებთ კურსს ევროპული დემოკრატიისკენ, ესეც ოქტომბერში გადაწყდება ფაქტობრივად. მომავალი არჩევნები იქნება წინგადადგმული ნაბიჯები ამ მიმართულებით, ჩვენ ყველამ უნდა დავიკაპიწოთ ხელები და ორმაგი ძალისხმევა ვაჩვენოთ ხალხს, რომ ისინი ტყუილად არ გვენდენ“ - განაცხადა პრეზიდენტმა.
მიხეილ სააკაშვილი ადგილობრივი თვითმმართველობების წარმომადგენლებს პრეზიდენტის სასახლეში შეხვდა.