პრეზიდენტის მიხეილ სააკაშვილის შეფასებით, მთელს მსოფლიოში არ არსებობს საქართველოს მსგავსი ეგალიტარული, გახსნილი და თავისუფალი დამოკიდებულება  მთავრობის წარმომადგენლებსა და საზოგადოებას შორის. ამის შესახებ მან თვითმმართველობების წარმომადგენლებთან შეხვედრაზე განაცხადა.
მისი თქმით, იმ ფონზე, როდესაც გარკვეული ძალები გადამეტებული ძალისხმევით ცდილობენ დემოკრატიის ყიდვას, მთავრობის პასუხი მათ მიმართ ორმაგი იქნება.
როგორც სააკაშვილმა განაცხადა, ერთის მხრივ, ამ ძალას სამართალდამცავი სისტემის პროპორციული ძალა, ხოლო მეორეს მხრივ, მათ მცდელობებს მთავრობის გადამეტებული დისპროპორციული ნება დაუპირისპირდება, რათა მომავალი არჩევნები მაქსიმალურად გახსნილი, ტრანსპარანტული და დემოკრატიული იყოს.
სააკაშვილის განმარტებით, იგი პირადად უზრუნველყოფს იმას, რომ ყველა პოლიტიკურმა ძალამ თანაბარი შესაძლებლობებით იმოქმედოს და საარჩევნო პროცესები იმ თვალსაჩინო ასპარეზზე განხორციელდეს, რასაც საზოგადოებრივი განსჯა და საზოგადოებრვი დებატები ჰქვია.
„ისინი ცდილობენ, წარმოადგინონ, თითოს ამ შენობაში ვიღაც ავტოკრატები სხედან, რომლებიც ვიღაცას აჩუმებენ და პირზე ხელს აფარებენ. ლოზუნგებით გამოდიან - არ გვინდა ავტოკრატია! ჩვენ ჩაგრულები ვარ ავტოკრატიის მიერ! რა ავტოკტატია? თქვენთან ხომ არ ბნელა? რომელ ცარიელ, ღია კარებს ვამტვრევთ და რას ვამტკიცებთ? სად არის საქართველოში თავისუფალი აზრის შეზღუდვა? რამდენ ქვეყანაშია, ასეთი ეგალიტარული, გახსნილი, თავისუფალი დამოკიდებულება მთავრობის წარმომადგენლებსა და საზოგადოებას შორის? სად არის ამდენი შეუზღუდავი უფლება“- განაცხადა სააკაშვილმა და დასძინა, რომ მთავრობა ძალიან ამაყობს იმით, რომ ყველაფერი გახსნილი და გამჭირვალეა.
მისი თქმით, ვისაც სურს, ყველას შეუძლია აზრის გამოთქმა და მიტინგის ჩატარება.
„გინდათ ვიღაცის გალანძღვა? მლანძღეთ რამდენიც გინდათ. აბსოლუტური იმუნიტეტი გამოვიმუშავე ყველანარი უხეშობისა და შეურაცხყოფების მიმართ“- განაცხადა სააკაშვილმა და აღნიშნა, რომ იგი ყოველთვის უსმენს კრიტიკულ აზრს და ამისკენ მოუწოდებს მთავრობის სხვა წარმომადგენლებსაც.