საქართველოს საგარეო საქმეთა მინისტრმა მიხეილ ჯანელიძემ ეუთოს ექსპერტებთან მედიის საკითხებში, ლიტვის ჟურნალისტთა კავშირის თავმჯდომარესთან დაინიუს რადზევიჩიუსთან (Dainius RADZEVIĈIUS) და ეუთოს წარმომადგენლის მრჩეველთან მედიის თავისუფლების საკითხებში აიდარ ბოტაგაროვთან (Aidar BOTAGAROV) შეხვედრა გამართა.

შეხვედრაზე საქართველოს საგარეო საქმეთა მინისტრი მიესალმა ეუთო-ს მედია ექსპერტების ვიზიტს საქართველოში და ხაზი გაუსვა მედიის საკითხებში ეუთო-ს წარმომადგენლის ოფისთან საქართველოს ნაყოფიერ თანამშრომლობას. მინისტრი მიესალმა მიმდინარე თვეს ეუთო-ს წარმომადგენლის მიერ თბილისში რეგიონალური მედია კონფერენციის ორგანიზებას, რომელსაც საქართველო უკვე მესამე წელია მასპინძლობს. აღინიშნა ბოლო წლების განმავლობაში მედიის საკითხებში ეუთო-ს სპეციალური წარმომადგენლის ანგარიშებში საქართველოში არსებული მედია გარემოს ცალსახად პოზიტიური შეფასებები.

შეხვედრაზე საუბარი შეეხო საქართველოში არსებულ მედია გარემოს და დადებითად შეფასდა ის ნაბიჯები, რომელიც საქართველოს ხელისუფლების მხრიდან ბოლო წლებში გადაიდგა ქვეყანაში მედია გარემოს გაუმჯობესების მიმართულებით. აღინიშნა მედია თავისუფლების საერთაშორისო რეიტინგებში საქართველოს პროგრესი. ექსპერტების მხრიდან დადებითად შეფასდა საქართველოს პრემიერ-მინისტრის ინიციატივები, რომელიც ქვეყანაში მედია თავისუფლების ხარისხის თვისობრივად კიდევ უფრო გაუმჯობესებას ისახავს მიზნად.