პარტია „დემოკრატიულ მოძრაობა-ერთიანი საქართველო“ მიიჩნევს, რომ სტასტუს-ნეიტრალური პასპორტის აღება ოკუპირებულ  ტერიტორიებზე მცხოვრები მოსახლეობისთვის ნებაყოფლობითი უნდა იყოს. ამის შესახებ დღევანდელ ბრიფინგზე „დემოკრატიული მოძრაობის“ სათათბიროს წევრმა, აფხაზეთიდან დევნილმა მამუკა აჩბამ განაცხადა.
მისი თქმით, საქართველოს ხელისუფლება არ უნდა ვაჭრობდეს ოკუპირებულ ტერიტორიებზე მცხოვრები ადამიანების მდგომარეობით, რაც გამოიხატება პრინციპით - „თუ ნეიტრალურ პასპორტი არ გექნება ვერ მიიღებ განათლების დაფინანსებას და სამედიცინო დახმარებას.“
„მისასალმებელია ის ფაქტი, რომ აშშ-მ და რამდენიმე ევროპულმა ქვეყანამ უკვე ოფიციალურად აღიარა სტატუს-ნეიტრალური პასპორტი. ოკუპირებულ ტერიტორიებზე მცხოვრები მოსახლეობისთვის ძალიან მნიშვნელოვანია ის, რომ მათ ამ დოკუმენტით სხვადასხვა ქვეყანაში სამედიცინო დახმარების, სწავლის მიღებისა, თუ ელემენტალურად ტურისტული მიზნით წასვლის საშუალება მიეცემათ“ - განაცხადა აჩბამ.
ამასთან, მისი თქმით, საქართველოს განათლების სამინისტრომ განაცხადა, რომ პირებს, რომელთაც გააჩნიათ შესაბამის ორგანოებში დადასტურებული სტატუს-ნეიტრალური პასპორტები, სრულად დაუფინანსდებათ სწავლა სხვადასხვა უმაღლეს სასწავლებელში და სხვადასხვა სახის სამედიცინო დახმარება.
აჩბა აღნიშნავს, რომ თუკი დღევანდელ ხელისუფლებას ნამდვილად სურს აფხაზი და ქართველი, ოსი და ქართველი ხალხის შერიგება, მაშინ მათ კეთილი ნებით უნდა დაეხმაროს და არა იძულებითი პასპორტიზაციის გზით.