ორგანიზაცია „საერთაშორისო გამჭვირვალობა-საქართველოს“ აღმასრულებელი დირექტორი ეკა გიგაური აცხადებს,  რომ ფარმაცევტულმა კომპანიებმა, რომლებზეც მისი ორგანიზაციის კვლევაში იყო საუბარი, მათთან თანამშრომლობის სურვილი თავად არ გამოთქვეს. 
ამის შესახებ გიგაურმა „ნიუსპრესთან“ საუბარში განაცხადა.
„საერთაშორისო გამჭვირვალობა - საქართველოს“ დირექტორმა „პე-ეს-პეს“, „ავერსისა“ და „ჯი პი სის“ ხელმძღვანელების მხრიდან კვლევის მიმართ გამოთქმულ შენიშვნებს უპასუხა და აღნიშნა, რომ ინფორმაციის გადასამოწმებლად ორგანიზაციამ აღნიშნულ კომპანიებს რამდენჯერმე მიმართა, თუმცა მათ თანამშრომლობის სურვილი არ გამოთქვეს.
„ჩვენ ამ კვლევას 7-8 თვის განმავლობაში ვაწარმოებდით და აღნიშნული კომპანიების წარმომადგენლები არ გამოგვეხმაურნენ. ამდენად, საუბარი, თითქოს მათ თანამშრომლობა სურდათ და ჩვენ ამის საშუალება არ მივეცით, მეტისმეტია, რადგან მათ ჰქონდათ შესაძლებლობა ჩვენთვის ინფორმაცია მოეწოდებინათ, თუმცა ეს არ გააკეთეს“-განაცხადა გიგაურმა და აღნიშნა, რომ უახლოეს ხანებში ორგანიზაცია საგანგებო განცხადებას გააკეთებს და იმ წერილებს წარმოადგენს, რომლითაც ის ფარმაცევტულ კომპანიებს ინფორმაციის მიწოდებას სთხოვს.
გიგაური ასევე აცხადებს, რომ კვლევის შედეგების პრეზენტაციამდე ორგანიზაციას „ავერსის“ წარმომადგენლები დაუკავშირდნენ და მასში მოყვანილი გარკვეული მონაცემების შეცვლა სთხოვეს.
„ზოგიერთ საკითხთან დაკავშირებით მათ წერილობითი ინფორმაცია მოგვაწოდეს და ყველა წონიანი არგუმენტი კვლევაში ავსახეთ“-აღნიშნა მან.
რაც შეეხება მონაცემების სიზუსტეს, გიგაური აცხადებს, რომ კვლევას საფუძვლად მსოფლიო ბანკის, ორგანიზაცია „კურაციოს“ და საქართველოს სტატისტიკის ეროვნული სამსახურის ოფიციალური მონაცემები დაედო. გარდა ამისა, „საერთაშორისო გამჭვირვალობა-საქართველომ“ კვლევის პროცესში ინტერვიუს მეთოდით მრავალი ექიმი და ჯანდაცვის სექტორში დასაქმებული ადამიანი გამოკითხა.
ფარმაცევტული ბაზრის კვლევის ანგარიშის პრეზენტაცია „საერთაშორისო გამჭვირვალობა-საქართველომ“ 22 ივნისს გამართა. ანგარიშში კომპანია „პე-ეს-პეს“, „ავერსის“ და „ჯი პი სის“ მიერ საქართველოს ფარმაცევტული ბაზარის მონოპოლიზებაზე, მედიკამენტებზე მოგების მაღალ მარჟასა და სხვა პრობლემურ საკითხზეა საუბარი.
კვლევას დღეს აღნიშნული კომპანიების წარმომადგენლები გამოეხმაურნენ და განაცხადეს, რომ მასში მოყვანილი მონაცემები სინამდვილეს არ შეესაბამება და ორგანიზაციას ინფორმაცია მათთან უნდა გადაემოწმებინა.