ბოლო დროს ქვეყანაში განვითარებული მოვლენების გათვალისწინებით, საქართველო ირანს უახლოვდება. ამის შესახებ „ნიუსპრესს“ პოლიტოლოგმა რამაზ საყვარელიძემ განუცხადა.
მისი თქმით, სატელიტური ანტენების დაყადაღება, გამკაცრებული პოლიტიკა და სხვა მსგავსი ქმედებები იმაზე მიუთითებს, რომ ქვეყანაში წინასაარჩევნოდ გარემო საკმაოდ დამძიმდება.
„სატელიტური თეფშების აღება ირანისთვის დამახასიათებელი თავისებურებაა, ოღონდ განსხვავება ის არის, რომ ირანის პრეზიდენტი ამბობს მესამე ვადით საპრეზიდენტო არჩევნებზე აღარ გავალო. ჩვენთან ჯერჯერობით ამ ტიპის დემოკრატია არ არის“- განუცხადა „ნიუსპრესს“ საყვარელიძემ.
პოლიტოლოგმა საუბრისას შს მინისტრის მოადგილის ეკა ზღულაძის დღევანდელ განცხადებაზეც გაამახვილა ყურადღება და აღნიშნა, რომ ნულოვანი ტოლერანტობის პოლიტიკამ ადრე არ გაამართლა.
„ვერ გეტყვით, დროის რა მონაკვეთში, მაგრამ ამის შედეგი ის იქნება, რაც სხვა ნულოვან ტოლერანტობას ჰქონდა. კრიმინალების მიმართ პრეზიდენტის მიერ გამოცხადებულმა ნულოვანმა ტოლერანტობამ შედეგად ის გამოიღო, რომ ერთ-ერთი ჭარბპატიმრიანი ქვეყანა ვართ“- აღნიშნა საყვარელიძემ და დასძინა, რომ ასეთი პოლიტიკით მოსახლეობაში უკმაყოფილების დონე და უსამართლობის განცდა სწრაფად გაიზრდება.
„საკითხავია, სად აფეთქდება ეს უსამართლობის განცდა და რა შედეგს გამოიღებს. უსამართლობის განცდა მოსახლეობასა და ხელისუფლებას შორის დისტანციას გაზრდის“- განაცხადა საყვარელიძემ.
შს მინისტრის მოადგილემ საგანგებო ბრიფინგზე მოსახლეობას ბოლო დროს ქვეყანაში განვითარებულ მოვლენებთან დაკავშირებით შინაგან საქმეთა სამინისტროს პოზიცია გააცნო და განაცხადა, რომ არჩევნებთან დაკავშირებით, ხელისუფლება არ დაუშვებს ამომრჩველის მოსყიდვას ან არჩვენების ნებისმიერი გზით გაყალბებას.
„განვაგრძობთ არჩევნების გაყალბების, ამომრჩეველთა მოსყიდვის ნებისმიერ მცდელობასთან დაკავშირებით, ძალიან მკაფიო და მკაცრ ნულოვანი ტოლერანტობის პოლიტიკას. ეს არ ნიშნავს, რომ რომელიმე კონკრეტული პოლიტიკური სუბიექტი განსაკუთრებული ინტერესის საგანია ან გახდება. ეს ნიშნავს, რომ კანონის აღსრულებისას კომპრომისები არ იქნება“ - განაცხადა მან.