ICM - კონფლიქტების მართვის ინსტიტუტისა და ICCN - კონფლიქტებისა და მოლაპარაკებების საერთაშორისო კვლევითი ცენტრის თანამშრომლობით ჩატარდა პრეზენტაცია თემაზე: „გერმანიის მიდგომები და პოლიტიკა საქართველო-რუსეთის ურთიერთობებთან მიმართებით“ (‘German Approaches and Politics towards Geo-Russ Relations’).
პრეზენტაციაზე წარმოდგენილი იყო კვლევა, რომელიც ჩატარდა კონფლიქტებისა და მოლაპარაკებების საერთაშორისო კვლევითი ცენტრის გერმანელი მოხალისის - ალისა ვითშენის მიერ. მკვლევარმა ისაუბრა რუსეთ-საქართველოს ურთიერთობებზე, პრობლემებზე და ევროკავშირის/ნატოს ფარგლებში დღეს არსებულ გამოწვევებზე.
პრეზენტაციის დროს განხილული იყო გერმანიის საერთაშორისო საშუამავლო აქტორის როლი საქართველოს კონფლიქტოგენურ ურთიერთობებში; მისი ჩართულობა აფხაზეთის რეგიონალური კონფლიქტის პოლიტიკური გზით მოგვარების პროცესში. შეხვედრაზე მსმენელებს შესაძლებლობა ჰქონდათ გასცნობოდნენ გერმანიის, როგორც მესამე ნეიტრალური მხარის ქმედებებს საქართველოსა და რუსეთის ურთიერთობებში და აღნიშნული კონფლიქტის კონსტრუქციულად გადაწყვეტასა და დეესკალაციის საკითხებს.
შეხვედრა ინტერაქტიულ რეჟიმში წარიმართა. ლექციაზე დამსწრე პირებმა, მათთვის საინტერესო კითხვები დასვეს. გაიმართა დისკუსია საქართველოს გამოწვევების შესახებ ევროკავშირში ინტეგრაციის მიმართულებით. საუბარი შეეხო რუსეთის პროპაგანდის ძალასა და ინფორმაციული ომის აქტუალობას.
კვლევის პრეზენტაციას დაინტერესებულ პირებთან ერთად, ახალგაზრდა სოციოლოგთა ასოციაციის მკვლევარები, TNS Georgia-სა და Club de Chance-ის წარმომადგენლები დაესწრნენ.
კონფლიქტების მართვის ინსტიტუტი ახლადდაარსებული არასამთავრობო ორგანიზაციაა, რომელიც მუშაობს კონფლიტების ანალიზისა და მართვის, საყოველთაო მშვიდობისა და სამოქალაქო ცნობიერების ამაღლების, სამეცნიერო საგანმანათლებლო საქმიანობის წარმოებისა და სოციალური აქტივობების ხელშეწყობისა და განხორციელების კუთხით.
ორგანიზაციის მისიაა ხელი შეუწყოს საზოგადოებაში საყოველთაო მშვიდობის დამკვიდრებას, კონფლიქტის ცნების დანერგვას - როგორც პოზიტიური მოვლენა.