„საზოგადოება 2030“-ის ხელმძღვანელი, გიორგი მამულაშვილი ბათუმში განვითარებულ მოვლენებს ეხმაურება.
„მინდა გამოვთქვა წუხილი და შეშფოთება ბათუმში განვითარებული მოვლენების გამო. ამ ეტაპისთვის, აუცილებელია სიმშვიდის შენარჩუნება. დღეს თითოეულმა ჩვენგანმა, როგორც ამ ქვეყნის მოქალაქეებმა, უნდა ავიღოთ პასუხისმგებლობა. ის, რასაც ვხედავდით ბათუმის ქუჩებში, სცდება გამოხატვის თავისუფლების ჩარჩოებს და მიმართულია სახელმწიფო ინსტიტუტების დისკრედიტაციისკენ, რასაც შესაძლებელია მოყვეს დესტაბილიზაცია და უმძიმესი შედეგები ქართული სახელმწიფოსათვის.
მივმართავ ახალგაზრდებს, გამოიჩინონ მეტი გონიერება და გააცნობიერონ თავიანთი მოქალაქეობრივი პასუხისმგებლობა. საკუთარი ქვეყნის, ქალაქისა და ხალხის წინაშე. ჩვენ ერთხელ და სამუდამოდ უარი უნდა ვთქვათ დაპირისპირებაზე. დროა, მეტი ძალისხმევა და ენერგია მივმართოთ ქვეყნის განვითარებისა და კეთილდღეობისკენ.
მოვუწოდებ ხელისუფლებას, მკაცრად აღკვეთოს პროვოკაციის ნებისმიერი მცდელობა. ასევე, ვიმედოვნებ, რომ წარიმართება ობიექტური და გამჭვირვალე გამოძიება, რომელიც პასუხს გასცემს დღეს საზოგადოებაში არსებულ კითხვებს. დღეს, ჩვენ მტკიცედ უნდა დავიცვათ სახელმწიფოებრიობა და დემოკრატიული ღირებულებები“-აცხადებს მამულაშვილი.