„სახალხო კრება“ საპარლამენტო არჩევნებისთვის მაჟორიტარობის კანდიდატებს შეარჩევს და კოალიცია „ქართულ ოცნებას“ უახლოეს დღეებში წარუდგენს.

როგორც „ნიუსპრესს“ „სახალხო კრების“ წევრმა, მსახიობმა სოსო ჯაჭვლიანმა განუცხადა, გადაწყვეტილება ერთიან მაჟორიტარ კანდიდატებზე შეთანხმების თაობაზე გუშინ კოალიციის ლიდერთან ბიძინა ივანიშვილთან გამართულ შეხვედრაზე მიიღეს.

„ბიძინა ივანიშვილმა შეხვედრაზე აღნიშნა, რომ თუ „სახალხო კრება“ ავტორიტეტულ და პატიოსნებით გამორჩეულ პირთა კანდიდატურებს წარადგენს, ის მათ სიამოვნებით განიხილავს“ - განაცხადა ჯაჭვლიანმა.

მისი თქმით, „სახალხო კრება“ ამ დღეებში გადაწყვეტს ვის კანდიდატურას შეარჩევს.

ჯაჭვლიანმა ხაზი გაუსვა, რომ ივანიშვილი „სახალხო კრების“ წარმომადგენლებთან თანამშრომლობაში პრობლემას ვერ ხედავს.

„სახალხო კრება“ არ არის პარტიული ორგანიზაცია, ის ზეპარტიულია და ყველასია“ - განაცხადა მან და აღნიშნა, რომ „სახალხო კრების“ წარმომადგენლებთან თანამშრომლობის ინიციატივა თავად ივანიშვილისგან წამოვიდა.

რაც შეეხება „სახალხო კრების“ წევრი „დემოკრატიული მოძრაობის“ ლიდერთან ნინო ბურჯანაძესთან კონსულტაციებს, მსახიობის თქმით, გუშინდელ შეხვედრაზე ამაზე საუბარი არ ყოფილა.

კოალიცია „ქართული ოცნების“ ლიდერმა ბიძინა ივანიშვილმა ერთ-ერთ ქართულ გამოცემასთან საუბარში აღნიშნა, რომ თუ ნონა გაფრინდაშვილი, სოსო ჯაჭვლიანი და ლუკა კურტანიძე რეგიონებში კოალიციასთან შეთანხმებით მაჟორიტარებად იყრიან კენჭს, „ქართული ოცნება“ საკუთარ კანდიდატურებს მოხსნის და მათ დაუჭერს მხარს.

ჯაჭვლიანის გარდა, ბიძინა ივანიშვილთან გუშინდელ შეხვედრას „სახალხო კრების“ სხვა წევრები - ნონა გაფრინდაშვილი, ლუკა კურტანიძე და გია ბურჯანაძე ესწრებოდნენ.