პარლამენტის მმართველი გუნდის წარმომადგენელი გიორგი კანდელაკი მიიჩნევს, რომ ამომრჩევლის მოსყიდვა ყველა ქვეყანაში დანაშაულია და წინასაარჩევნო კამპანია არა ფულის, არამედ იდეების ჭიდილი უნდა იყოს.
როგორც კანდელაკმა „გლობალ კონტაქტ კონსალტინგის“ დაუმონტაჟებელ ანტენების დაყადაღების პროცესთან დაკავშირებით დღეს ჟურნალისტებს განუცხადა, ნებისმიერ ქვეყანაში „თუ ვინმე მაცივრებით და სარეცხი მანქანებით ამომრჩეველის მოსყიდვას შეეცდება, დაისჯება“.
„საქმე გვაქვს ამომრჩევლის მოსყიდვის მცდელობასთან, მათ შორისაა ანტენების გადაცემა, რომელიც 2 თეთრი ნამდვილად არ ღირს, ამომრჩევლის მოსყიდვად კვალიფიცირდება“ – აღნიშნა კანდელაკმა.
მისი თქმით, უდაოა, რომ „ქართული ოცნება“ საარჩევნო სუბიექტია, რომელიც საარჩევნო კამპანიას ეწევა და პოლიტიკურ კონკურენციაში მონაწილეობს.
დეპუტატი დარწმუნებულია, რომ მიმდინარე პროცესები ქვეყანაში ვითარების დაძაბვას ხელს არ შეუწყობს.
„საქართველო თავისუფალი ქვეყანაა. პოლიტიკური კონკურენცია ღია გარემოში მიმდინარეობს. მედიაზე წვდომა, როგორც ევროკავშირის მიერ დაფინანსებული, მხარდაჭერილი და ორგანიზებული მედიამონიტორინგითაც დასტურდება, თანაბარია. პარტიები საარჩევნო კამპანიას შეუფერხებლად ახორციელებენ“ – განაცხადა კანდელაკმა.
პოლიცია თბილისში და ასევე კომპანიის რეგიონებში მდებარე ოფისებში, სასამართლოს გადაწყვეტილების საფუძველზე, „გლობალ კონტაქტ კონსალტინგის“ დაუმონტაჟებელ ანტენებს აყადაღებს.